პატიმრობაში მყოფი ყოფილი პრემიერმინისტრი ირაკლი ღარიბაშვილის სოციალურ ქსელში განცხადებას ავრცელებს, რომელშიც წერს, რომ "ხვალ გაავრცელებს ვრცელ წერილს და საზოგადოებას "მის სიმართლეს" იტყვის. ღარიბაშვილის იმასაც წერს, რომ დღეიდან, მისი და მისი ოჯახის უსაფრთხოებაზე სრული პასუხისმგებლობა ეკისრება ბიძინა ივანიშვილს და მთელ ხელისუფლებას!

"ეს წერილი გამომიგზავნეს ბიძინა ივანიშვილის დავალებით. მე ყველაფერი ვცადე და გავაკეთე, რომ ეს ნაბიჯი არ გადამედგა, სამწუხაროდ, სხვა გზა არ დამიტოვეს, რომ წინ არ აღვუდგე ამ ღირსების შემლახავ ბოროტებას! ამ დაუნდობელ სისასტიკეს, ჩაგვრას/უსამართლობას, ჩემი და ჩემი ოჯახის განადგურების ბინძურ გეგმას! ხვალ გავავრცელებ ვრცელ წერილს და საზოგადოებას ვეტყვი ჩემს სიმართლეს! დღეიდან, ჩემი და ჩემი ოჯახის უსაფრთხოებაზე სრული პასუხისმგებლობა ეკისრება ბიძინა ივანიშვილს და მთელ ხელისუფლებას!", — წერს ღარიბაშვილი და წერილს აქვეყნებს, რომელშიც წერია:

"დიტო ჩუბინიძისნაირმა, ირმა ინაშვილისნაირმა "მხარდამჭერებმა" და სოციალურ ქსელებში დაორგანიზებულმა კამპანიებმა ძალიან სერიოზული ეჭვები გააჩინეს და მაგრად დაგვაზიანეს. ძალიან ინტენსიური მუშაობა მიდის რამდენიმე საქმეზე, რომლების სავარაუდო შედეგები იქნება კორუფციის ბრალდებები. ამიტომ არსებობს ჩვენი მოქმედების ორი ვარიანტი: 1. ვიდავოთ სერიოზულად და ბოლომდე მივაწვეთ. 2. (მეორე ვარიანტი თვითონ შემოგვთავაზეს, როგორც კომპრომისული გამოსავალი) — ვაღიაროთ (ჩვენ თავზე ავიღოთ) ერთი რომელიმე საქმე, სადაც შეთანხმებით მოხდება ყველაფერი, აღიარებაც, მოწმეების მხრიდან ხელის დადებაც და ა.შ. ამ შემთხვევაში გვთავაზობენ საპროცესო შეთანხმებას იგივე 5 წლიანი ვადით, ანუ როგორც მიხსნიან, სასჯელები ერთმანეთს შთანთქავენ და ისევ 5 წელი დარჩება. გამოსვლის შემდეგ არ უნდა გავეკარო პოლიტიკას და თუ "გადაგდებას გადაწყვეტ", კორუფციული ბრალდება, რომელიც ნაღიარები გექნება, იქნება დაზღვევის მექანიზმი, რომ პოლიტიკაში დაბრუნება არ იფიქრო", — ნათქვამია წერილში, რომელიც ირაკლი ღარიბაშვილის თქმით, მას ბიძინა ივანიშვილის დავალებით გაუგზავნეს.

2026 წლის 12 იანვარს სასამართლომ პროკურატურასა და ღარიბაშვილს შორის გაფორმებული საპროცესო შეთანხმება დაამტკიცა და იგი დამნაშავედ ცნო. საქმე ეხებოდა განსაკუთრებით დიდი ოდენობით უკანონო შემოსავლის მიღებასა და ლეგალიზაციას (ფულის გათეთრებას). მას მიესაჯა 5 წლით თავისუფლების აღკვეთა და 1 მილიონი ლარის ჯარიმა. ასევე სახელმწიფოს სასარგებლოდ ჩამოერთვა დანაშაულებრივ საქმიანობასთან დაკავშირებული და ჩხრეკისას ამოღებული თანხა.