საქართველოს მე-5 პრეზიდენტი სალომე ზურაბიშვილი 26 ივლისს საკრებულოსთან აქტივისტების დაკავებას "ტვ პირველთან" საუბრისას გამოეხმაურა. მისი თქმით, ბანერების გამო აქტივისტების დაკავება "გამოხატვის თავისუფლების კიდევ ერთი დარღვევა".

"ქვეყანა, სადაც აღარ შეიძლება არც ხუმრობა, არც პლაკატი, არც სიტყვა, არც ფეისბუქი, არც რამენაირად გამოხატო შენი აზრი, არ არის ქვეყანა, სადაც რამე ფორმით შეიძლება ითქვას, რომ თავისუფლება სუფევს.

...ეს არის წარმოუდგენელი, მაგრამ ეს იმას ნიშნავს, რომ ეს რეჟიმი უკვე არის გადასული ყველა ზღვარს და ყველა ზომიერებას, აღარ იცის თვითონ რა არის მისთვის საფრთხე. მისთვის მთავარი საფრთხე არის თავისივე ქმედება. დღეს უკვე გადავიდნენ ყველანაირ ზღვარს. ყველაფრის რომ ეშინიათ და ყველაფერს რომ მიაწერენ საფრთხეს, ეს იმას ნიშნავს, რომ მისულები არიან ბოლოსკენ", — განაცხადა ზურაბიშვილმა.

თბილისის საკრებულოსთან ბანერების გამო, რომლებზეც ეწერა: "ბიძინა *ლეა? კი/არა", 10 აქტივისტი დააკავეს. შსს-ის ინფორმაციით, დაკავებულებს "საჯარო სივრცეში შეურაცხმყოფელი ბანერები ეჭირათ. გარდა ამისა, ისინი გამოთქვამდნენ შეურაცხმყოფელ ფრაზებს, არღვევდნენ საზოგადოებრივ წესრიგს და წინააღმდეგობას უწევდნენ სამართალდამცველებს. პოლიციელებმა აღნიშნული პირები ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს", — აცხადებს შსს.