ილონ მასკმა განაცხადა, რომ ხელოვნური ინტელექტის პლატფორმა Grok Imagine ჰომეროსის ოდისეის "ისტორიულად ზუსტ" ადაპტაციას შექმნის. ამის შესახებ მასკმა X-ზე მას შემდეგ დაწერა, რაც ნოლანის ფილმის მსოფლიო პრემიერა წარმატებით შედგა. მანამდე კი მასკი ნოლანს შერჩეული მსახიობების გამო ხშირად აკრიტიკებდა.

"წლის ბოლომდე Grok Imagine ოდისეის სრულმეტრაჟიან ფილმს შექმნის, რომელშიც დაცული იქნება ისტორიული სიზუსტე და ჰომეროსის მხატვრული ჩანაფიქრი", — წერს ილონ მასკი X-ზე. მასკმა ასევე გააზიარა Grok Imagine-ით გენერირებული 3-წუთიანი ვიდეო, რომელშიც ოდისევსისა და ნიმფა კალიფსოს შეხვედრის სცენაა ასახული.

ნოლანის ახალი ფილმის მსოფლიო პრემიერა გასულ პარასკევს შედგა. ნოლანის ოდესეამ თითქმის საყოველთაო მოწონება დაიმსახურა და დიდი კომერციული წარმატებაც მოიპოვა. ფილმის პრემიერამდე მასკმა არაერთხელ გააზიარა შეურაცხმყოფელი პოსტები და ნოლანი მსახიობების შერჩევის გამო გააკრიტიკა. მასკის აზრით, ლუპიტა ნიონგო და ელიოტ პეიჯი როლებზე არ უნდა დაემტკიცებინათ. მან ისიც დასძინა, რომ ნოლანს "უბრალოდ ჯილდოების მიღება სურს და პრინციპები დაკარგა".

მასკის მცდელობებს საზოგადოებაზე დიდი გავლენა არ მოუხდენია, რადგან ოდისეამ გამოსვლის პირველსავე შაბათ-კვირას $264 მილიონი გამოიმუშავა და Rotten Tomatoes-ზე მაყურებელთა 97%-იანი მოწონება დაიმსახურა.

ასევე იხილეთ:

ადამიანი, დრო და ღმერთები — ოდისეა მოლოდინებს მიღმა