სოციალურ ქსელში დაწერილი პოსტის გამო "ფორმულას" ჟურნალისტს, ვახო სანაიას 14-დღიანი პატიმრობა შეეფარდა. გადაწყვეტილება მოსამართლე ზვიად ცეკვავამ მიიღო. არც ვახო სანაია და არც მისი ადვოკატი პროცესს არ დასწრებიან.

განაჩენის გაგების შემდეგ, ჟურნალისტი "ტვ პირველთან" აცხადებს, რომ მისთვის არანაირი მნიშვნელობა არ აქვს ე.წ. სასამართლო რა განაჩენს გამოიტანს, მას სიტყვის თქმას ვერავინ აუკრძალავს.

"ჩემთვის არანაირი მნიშვნელობა არა აქვს, ე.წ. სასამართლოს რა სხდომებს გამართავს. საერთოდ არ მაინტერესებს. წერონ და იკითხონ. მე მაინტერესებს ის, რომ მე დავწერ და წავიკითხავ იმას, რაც საჭიროდ მიმაჩნია. ეს იქნება ეთერში, ეს იქნება სოციალური ქსელებით... სიტყვის თქმას ვერავინ აგვიკრძალავს. ასე რომ, ამ სქროლვის სააგენტოს თუ სამმართველოს შეუძლია, გააგრძელოს თავისი ე.წ. მოღვაწეობა. სასამართლომ განიხილოს სხდომებზე, შემდეგ იქ მიტანილი სქრინები, ვურჩევდი, რომ ხმამაღლა წაიკითხონ ხოლმე, ასე უფრო საინტერესო იქნება ჩემი სტატუსები. არანაირი მნიშვნელობა ჩემთვის არ აქვს ჯარიმას დაწერს ე.წ. მოსამართლე, პატიმრობის გადაწყვეტილებას გამოაცხადებინებენ, თუ რაც იქნება. ჩემთვის ამას არ აქვს არანაირი მნიშვნელობა, ჩემს საქმიანობაში ეს არაფერს ცვლის, გინდა პატიმრობა იყოს, გინდ ჯარიმა", — ამბობს სანაია.

დღევანდელ განაჩენს წინ უძღოდა 6000 ლარიანი ჯარიმა სოციალურ ქსელში დაწერილი პოსტისთვის.

"დავწერე, ნუ უწოდებთ-მეთქი შალვა პაპუაშვილსა და ლადო ბოჟაძეს *ლეებს. ხომ გახსოვთ, რომ ამის გამო დამაჯარიმეს. ანუ სასამართლომ ამით თქვა, რომ მე რეალურად იმ სტატუსით ლადოსა და შალვას *ლეები ვუწოდე, მიუხედავად იმისა, რომ სხვებს მოვუწოდე, არ ეწოდებინათ მათთვის *ლეები.

მოვიდა ახალი ფურცლები. სქროლვა/სქრინვის სამმართველო კიდევ მიჩივის. გავიმეორებ, მე ხომ დამაჯარიმეს ლადოსა და შალვასთვის *ლეების დაძახებისთვის, არადა ზემოთაც დავწერე, მე, პირიქით, მოვუწოდე სხვებს, რომ არ ეწოდებინათ მათთვის *ლეები. მოკლედ, ამის შემდეგ დავწერე კიდევ ერთი სტატუსი, სადაც გულისტკივილი გამოვთქვი. პოსტის არსი ესაა: ასეთი კარგი მოწოდების გამო თუ მაჯარიმებთ 6 ათასი ლარით, მაშინ რაც გინდათ, ის ქენით, თუ გინდათ, დაუძახეთ *ლეები და იყავით-მეთქი", — დაწერა სოციალურ ქსელში ვახო სანაიამ.