მომღერალმა ალექსანდრე მრელაშვილმა თელავის პოლიციის დეპარტამენტის შენობა გვიან ღამით დატოვა. ამის შესახებ ინფორმაციას "მთავარი ამბები კახეთიდან" ავრცელებს. მათი ცნობით, მრელაშვილი 19 ივლისს საგამოძიებო უწყებაში მოწმის სახით იყო დაბარებული და კახეთში, სასტუმრო "აგარანის მამულში" მომხდარ ინციდენტთან დაკავშირებით იკითხებოდა, სადაც რუს ტურისტებსა და ქორწილში მყოფ პირებს შორის დაპირისპირება მოხდა.

როგორც შსს-ში აცხადებენ, მრელაშვილმა "გამოკითხვაზე ბოლომდე დარჩენა არ ისურვა, რა დროსაც პოლიციელებს შეურაცხყოფა მიაყენა და პირადი ნივთების შესანახი კარადა დააზიანა". შსს-მ მის მიმართ ადმინისტრაციული სამართალწარმოება დაიწყო.

ადვოკატი ლაშა კაპანაძე, რომელიც ინციდენტისას დაკავებული კაცის, გიორგი ჭიღლაძის ინტერესებს იცავს, ჰყვება, რომ პოლიციამ ალექსანდრე მრელაშვილი "ძალის გამოყენებით დააკავა და შეათრია განყოფილებაში"

"რა ჩვენება მისცა არ ვიცი, არ წამიკითხავს. ვიცი ის, რომ რა საჯარო ქარდიც გამოქვეყნდა საინფორმაციო უწყებების მიერ, ვიცი რომ დააფიქსირა ალექსანდრე მრელაშვილმა, რომ სასტუმროში მესამე სართულზე მყოფმა პირებმა გადმოასხეს რაღაც სითხე, რომელიც დაესხა აპარატურას და დაზიანდა. დღეს იმყოფებოდა ალექსანდრე მრელაშვილი ჩვენების მისაცემად. ხელახლა მოხდა მისი დაბარება გაურკვეველი მიზეზების გამო, არ ვიცი როცა განყოფილებასთან მოვედი ალექსანდრე მრელაშვილი გამოვიდა და რაღაც ასეთ სიტყვებს ამბობდა – უკვე მიცემული მაქვს ჩვენება და არაფრის შეცვლას აღარ ვაპირებ, რაზეც გამოეკიდნენ პოლიციელები, ძალის გამოყენებით დააკავეს და შეათრიეს განყოფილებაში", — განუცხადა გამოცემას "მთავარი ამბები კახეთიდან" ადვოკატმა ლაშა კაპანაძემ.

დაკითხვაზე შესვლამდე მრელაშვილმა "ტვ პირველს" განუცხადა, რომ ქორწილის მიმდინარეობისას ზევიდან ვიღაც სითხეს ასხამდათ, იფურთხებოდა და ლანძღავდათ, რის გამოც "ქორწილი ვეღარ გააგრძელეს".

"ვატარებდი საღამოს ქორწილს და ზევიდან ვიღაცა გვასხამდა, არ ვიცი, არაყი იყო, შამპანური იყო თუ რა იყო, სითხეს გვასხამდა და არ გაჩერდა. შემდეგ ისევ გამოდიოდა, იფურთხებოდა და გვლანძღავდა. ჩაუშალათ ქორწილი… ვეღარ გავაგრძელეთ ქორწილი. [აპარატურა] დაზიანებულია თუ არა ჯერ არ ვიცით… ახლა დაკითხვაზე ვარ", — უთხრა "ტვ პირველს" მომღერალმა ალექსანდრე მრელაშვილმა.

შეგახსენებთ, რომ 18 ივლისს, თელავში, სასტუმრო "აგარანის მამულში" ინციდენტი მოხდა. ქორწილის მსვლელობისას, სასტუმროს მესამე სართულზე, ერთ-ერთ ნომერში მყოფმა უცხო ქვეყნის მოქალაქე ქალებმა შეურაცხყოფა მიაყენეს ქორწილის სტუმრებს და სითხე დაასხეს. რის შემდეგაც სიძის ძმას, გიორგი ჭიღლაძე ნომერში მყოფ ერთ-ერთ ქალს დაარტყა. შსს-მ გიორგი ჭიღლაძე დააკავა. შსს-ს ცნობით, გამოძიება ჯანმრთელობის განზრახ მსუბუქი დაზიანების ბრალდებით დაიწყო და დაკავებულს 3 წლამდე პატიმრობა ემუქრება.

სოციალურ ქსელში გავრცელდა სასტუმროს ნომერში მყოფი ერთ-ერთი რუსი ეროვნების ქალის კომენტარი, სადაც ის ამბობს, პროვოკაცია მათ არ მოუწყვიათ.

"შესაძლოა, სიტყვიერი დაპირისპირება იყო, მაგრამ ცალსახად, 100%-ით შემიძლია ვთქვა, რომ ჩვენი გოგოები ვულგარულად არ საუბრობდნენ. ისინი არ იგინებოდნენ და არ ჩხუბობდნენ. პირველად ჩხუბი მეორე მხარემ დაიწყო. ეს მათ ვიდეოზეც კი ჩანს. ჩვენი გოგოები უცენზუროდ არ გამოხატავდნენ აზრს, არ შეურაცხყოფდნენ არც ერთ ქვეყანას, არც ერთ ადამიანს და არასდროს გადასულან პიროვნულ შეურაცხყოფაზე, ეს 100%-იანი სიმართლეა. მე საერთოდ ოთახში ვიყავი. როცა ეს სიტუაცია მოხდა, უბრალოდ გოგოების დასაცავად დავდექი, რადგან ის [გიორგი ჭიღლაძე] ოთახში შემოიჭრა", — ამბობს ალიონა ნესტერიუკი.