პოლიციამ დააკავა კაცი, რომელმაც თელავის ერთ-ერთ სასტუმროში რუსულად მოლაპარაკე ქალს მუშტი დაარტყა. უწყების ინფორმაციით, გამოძიება ჯანმრთელობის განზრახ მსუბუქი დაზიანების ბრალდებით დაიწყო და დაკავებულს 3 წლამდე პატიმრობა ემუქრება.

რა ხდებოდა კონფლიქტამდე?

შინაგან საქმეთა სამინისტროს განცხადებაში ვკითხულობთ, რომ დაძაბულობა მას შემდეგ შეიქმნა, რაც სასტუმროში ქორწილის მიმდინარეობისას უცხო ქვეყნის მოქალაქეებმა სასტუმროს ნომრის აივნიდან შეურაცხყოფა მიაყენეს ქორწილში მყოფ პირებს და წყალი დაასხეს აპარატურას.

"მოწმეთა ჩვენებების მიხედვით, თელავში, ერთ-ერთ სასტუმროში, ქორწილის მიმდინარეობისას სასტუმროში დამსვენებელმა უცხო ქვეყნის მოქალაქეებმა სასტუმროს ნომრის აივნიდან შეურაცხყოფა მიაყენეს ქორწილში მყოფ პირებს და წყალი დაასხეს აპარატურას, რის შემდეგაც ბრალდებულმა ფიზიკური დაზიანება მიაყენა უცხო ქვეყნის მოქალაქე ქალს", — წერს უწყება.

ერთ-ერთი თვითმხილველი სოციალურ ქსელში წერს, რომ უცხო ქვეყნის მოქალაქეებმა ქორწილის მონაწილეებს ღვინო და სხვადასხვა სითხე გადაასხეს, მომღერლებს კი აფურთხებდნენ. პოსტში ასევე ვკითხულობთ, რომ ოჯახმა მრავალჯერ სთხოვა ადმინისტრაციას, ზომები მიეღო, მაგრამ — უშედეგოდ. ვიდეოში ნაჩვენები მამაკაცი სიძის ძმაა.

მას შემდეგ, რაც კაცი სასტუმროს ნომერში ავიდა ქალებთან სასაუბროდ, თვითმხილველის ვერსიით, არაფხიზელ მდგომარეობაში მყოფმა ქალმა მას ფიზიკური შეურაცხყოფა მიაყენა და რუსულად საუბარი მოსთხოვა.

თვითმხილველმა პოსტს დაურთო ფოტო, რომელზეც ჩანს, რომ კაცს ფიზიკური დაზიანებები აღენიშნება.

"ნახავდით ვიდეოს. სამწუხარო ფაქტია, მაგრამ მედალს ყოველთვის ორი მხარე აქვს.
მათი შოვინისტური ბრალდება თითქოს ჩვენ მათ დავესხით რუსულად საუბრის გამო არის დიდი სიცრუე. შოვინიზმს და რაშიზმს ადგილი არ ჰქონია, რადგან მათ გარდა სხვა რუსულენოვანი სტუმრებიც იყვნენ ლოკაციაზე.

მაქსიმალურად მოვითმინეთ მათი საქციელი. ღვინოს და რაღაც სითხეებს გვასხავდნენ და გვეძახდნენ პაპუასების ქვეყანა ხართო და თან იღებდნენ. მომღერალს აფურთხებდნენ.
იყვნენ არაადეკვატურად მთვრალები და პროვოკაციულები. მაქსიმალური მოწოდებების და სასტუმროს ადმინისტრაციის გაფრთხილების მიუხედავად, არ შეწყვიტეს ჩვენი ხალხის და ქვეყნის შეურაცხყოფა.

სიტუაცია მწვავდებოდა და ადმინისტრაცია ამბობდა რომ დეესკალაციას მოახდენდნენ, მაგრამ სამწუხაროდ სიტუაცია უფრო გამწვავდა. სამწუხაროდ ამ დროს ჩვენი მეგობარი ავიდა მოსალაპარაკებლად და იმის სათქმელად რომ ქორწილს გვიშლიდნენ და მათი საქციელი იყო შეუსაბამო. ამ გოგონამ მოსთხოვა რომ ესაუბრა რუსულად და ჩემი მეგობრის პასუხი იყო რომ საქართველოშია და ან ქართულად ან ინგლისურად დალაპარაკებოდნენ. ამ გოგომ მიაყენა ფიზიკური შეურაცხყოფა. თავს დაესხა. ჩემმა მეგობარმა მრავალჯერ მოიგერია და სამწუხაროდ აფექტის მდგომარეობაში მოხდა ის რაც მოხდა.

ვემიჯნებით ყველანაირ ძალადობას, მაგრამ პროვოკაცია მოწყობილი იყო მათ მიერ. იმდენად მთვრალები იყვნენ რომ განყოფილებაში იგინებოდნენ, ყვიროდნენ, დერეფანში წვებოდნენ და სიტუაციის ანალიზი ჰქონდათ 0.

ეს არ არის გამართლება. ეს არის სრული ისტორია." — წერს ქორწილის სტუმარი სოციალურ ქსელში.

ფიზიკური დაპირისპირების ამსახველი ვიდეო უცხოეთის მოქალაქეებმა სოციალურ ქსელში გაავრცელეს. მათი მტკიცებით, კაცი მათ "რუსულად საუბრის გამო" დაესხა თავს.

მომხდარს სასტუმროს ადმინისტრაციაც გამოეხმაურა. "Agarani Estate"-ის მტკიცებით, სასტუმროს ადმინისტრაციამ სიტუაციის დაძაბვისთანავე ზომები მიიღო და პოლიცია გამოიძახა.

"გუშინ Agarani Estate-ში ცალკეულ სტუმრებს შორის მომხდარ ინციდენტთან დაკავშირებით გვსურს საზოგადოებას მივაწოდოთ განახლებული ინფორმაცია.

ძალადობას ადგილი არ აქვს Agarani Estate-ში. ღრმად ვწუხვართ, რომ მსგავსი ინციდენტი ჩვენს ტერიტორიაზე მოხდა და გულწრფელად ვუსურვებთ სრულ გამოჯანმრთელებასა და კეთილდღეობას ყველა მონაწილე პირს.

როგორც კი ჩვენმა გუნდმა შენიშნა, რომ მონაწილე პირებს შორის სიტუაცია იძაბებოდა, სამართალდამცავი ორგანოები დაუყოვნებლივ გამოიძახა, მანამდე, სანამ ფიზიკური დაპირისპირება მოხდებოდა. ინციდენტის შემდეგ ასევე დაუყოვნებლივ გამოიძახეს სასწრაფო სამედიცინო დახმარება. ჩვენი გუნდი დაეხმარა მონაწილე პირებს, უზრუნველყო ყველა შესაბამისი ინფორმაციის დაფიქსირება და სრულად აგრძელებს თანამშრომლობას უფლებამოსილ ორგანოებთან.

შიდა მოკვლევის შედეგად გვსურს განვმარტოთ ორი მნიშვნელოვანი გარემოება:
Agarani Estate-ის არცერთ თანამშრომელს არ გაუმჟღავნებია სტუმრის ოთახის შესახებ ინფორმაცია სხვა სტუმრისთვის.

Agarani Estate-ის არცერთი თანამშრომელი არ ყოფილა ჩართული აღნიშნულ ფიზიკურ დაპირისპირებაში.

ჩვენი სტუმრების კონფიდენციალურობისა და უსაფრთხოების დაცვა ჩვენი ერთ-ერთი უმთავრესი პასუხისმგებლობაა და ეს პრინციპები ჩვენი საქმიანობის საფუძველს წარმოადგენს.
აღნიშნულ ფაქტზე მიმდინარეობს ოფიციალური გამოძიება. ჩვენ სრულ პატივს ვცემთ ამ პროცესს და მისი დასრულებამდე კონკრეტულ გარემოებებთან დაკავშირებით დამატებით კომენტარს არ გავაკეთებთ.

სამწუხაროდ, ინციდენტის შემდეგ ინტერნეტსივრცეში ფართოდ გავრცელდა არაერთი არაზუსტი ინფორმაცია და ცრუ ბრალდება, რომელიც ეხება ჩვენს სასტუმროს, ჩვენს თანამშრომლებსა და მფლობელებს. მოვუწოდებთ ყველას, დაეყრდნონ მხოლოდ დადასტურებულ ფაქტებს და არა ვარაუდებსა თუ დაუდასტურებელ ინფორმაციას, სანამ უფლებამოსილი ორგანოები საქმის ყველა გარემოებას სრულად არ დაადგენენ.

Agarani Estate სიამოვნებით მასპინძლობს სტუმრებს მსოფლიოს სხვადასხვა ქვეყნიდან და განსხვავებული კულტურული თუ ეროვნული წარმომავლობის მქონე ადამიანებს. ჩვენ კატეგორიულად ვემიჯნებით დისკრიმინაციას, სიძულვილსა და ძალადობას ნებისმიერი ფორმით და კვლავაც ვრჩებით ერთგული ჩვენი ვალდებულების — შევქმნათ უსაფრთხო, პატივისცემაზე დაფუძნებული და სტუმართმოყვარე გარემო თითოეული სტუმრისთვის," — წერს სასტუმრო.

დაკავებული სიძის ძმის, გიორგი ჭიღლაძის ადვოკატის მტკიცებით, "რუსულად მოლაპარაკე, სავარაუდოდ, რუსმა დამსვენებლებმა ვერ აიტანეს ვერანდაზე არსებული ქართული ქორწილი და ქართული სიმღერები, რის გამოც მოაწყვეს პროვოკაცია და როგორც ქცევაზე ეტყობოდათ იმყოფებოდნენ გაურკვეველი ნივთიერების თრობის ქვეშ.

გიორგი ჭიღლაძე არის რუსების მიერ მოწყობილი პროვოკაციის მსხვერპლი და თავადაც დაზარალებული".

ამას გარდა, ის სოციალურ ქსელში წერს, რომ "გიორგი ჭიღლაძე 2026 წლის 19 ივლისს დააკავეს და ამჟამად იმყოფება გურჯაანის დროებითი მოთავსების იზოლატორში. გამოძიება მიმდინარეობს საქართველოს სისხლის სამართლის კოდექსის 120-ე მუხლით". დაკავებულის ადვოკატი მოითხოვს, რომ გიორგი ჭიღლაძეს ჩაუტარდეს სამედიცინო ექსპერტიზა და გიორგი ჭიღლაძისთვის მიყენებული დაზიანების ამსახველ ფოტოსურათს ავრცელებს.