უკრაინული დრონების თავდასხმებმა შესაძლოა რუსეთის ნავთობგადამამუშავებელი ქარხნის სიმძლავრის 20%-დან 40%-მდე გაანადგურა. ინფორმაციას ამის შესახებ Financial Times ავრცელებს.

გამოცემის თანახმად, ივნისში რუსეთი დღეში საშუალოდ 4.1 მილიონ ბარელ ნავთობს ამუშავებდა, რაც ბოლო ხუთი წლის საშუალო მაჩვენებელზე 28%-ით, ხოლო ქვეყნის ნომინალურ სიმძლავრეზე 35%-ით ნაკლებია.

Financial Times წერს, რომ მაისიდან უკრაინამ მნიშვნელოვნად გააძლიერა დარტყმები რუსეთის ენერგეტიკულ ინფრასტრუქტურაზე. ამ დროის განმავლობაში თავდასხმის სამიზნე გახდა რუსეთის 10 უმსხვილესი ნავთობგადამამუშავებელი ქარხანა, მათ შორის ომსკის ქარხანა, რომელიც ფრონტის ხაზიდან დაახლოებით 2 500 კილომეტრში მდებარეობს და ქვეყნის გადამამუშავებელი სიმძლავრის დაახლოებით 7%-ს შეადგენს.

გამოცემის შეფასებით, საწვავის დეფიციტი უკვე რუსეთის დაახლოებით 50 მილიონ მცხოვრებს, ანუ მოსახლეობის 35%-ს, შეეხო. 8 ივლისისთვის საწვავის გაყიდვაზე შეზღუდვები რუსეთის რეგიონების უმეტესობაში ადგილობრივმა ხელისუფლებამ ან საცალო მოვაჭრეებმა დააწესეს.

ამასთან, 25 ივნისისთვის საწვავის რეალიზაციაზე გარკვეული ფორმის შეზღუდვა რუსეთის თითქმის 50 რეგიონში მოქმედებდა. ქვეყნის სხვადასხვა ნაწილში ბენზინგასამართ სადგურებთან გრძელი რიგები დაფიქსირდა, ხოლო ოკუპირებულ ყირიმში საგანგებო მდგომარეობაა გამოცხადებული და საწვავის შეძენა მხოლოდ ელექტრონული ვაუჩერებით არის შესაძლებელი.

როგორც Ukrainska Pravda აღნიშნავს, 7-8 ივლისის ღამეს უკრაინის უპილოტო სისტემების ძალებმა იერიში მიიტანეს ყუბან-ყირიმის ენერგოხიდის ძირითად ელექტროობიექტზე, ხუთ ელექტროსადგურზე, სამხედრო საწვრთნელ პოლიგონსა და რუსეთის საჰაერო თავდაცვის სამ რადარზე. ამავე პერიოდში უკრაინამ აზოვის ზღვაში რუსეთის ე.წ. "ჩრდილოვანი ფლოტის" ცხრა ტანკერსაც დაარტყა.

მანამდე ცნობილი გახდა, რომ უკრაინული დრონებით განხორციელებული თავდასხმის შემდეგ მუშაობა შეაჩერა რუსეთის უდიდესმა ნავთობგადამამუშავებელმა ქარხანამ, ომსკის საწარმომ.