Stranger Things-ის ვარსკვლავები, მილი ბობი ბრაუნი და დევიდ ჰარბორი, Netflix-ისა და A24-ის ახალ სერიალში ისევ ერთიანდებიან.

ჯერჯერობით უსათაურო პროექტში ისინი მამისა და შვილის როლებს შეასრულებენ. სერიალის სცენარის ავტორი ემის პრემიის მფლობელი და სერიალ Adolescence-ის შემქმნელი ჯეკ თორნია. თორნი ბრაუნთან და ჰარბორთან ერთად სერიალის აღმასრულებელი პროდიუსერიც იქნება.

ფოტო: Deadline

Netflix-ის მხატვრული სერიალების ხელმძღვანელმა, ჯინი ჰაუმ, თორნი ღრმა, ადამიანური ისტორიის შექმნისთვის შეაქო. "მილი ბობი ბრაუნისა და დევიდ ჰარბორის კვლავ ერთად ხილვა — ამჯერად კრიზისის საპირისპირო მხარეს მყოფი, გაუცხოებული მამა-შვილის როლში — მაყურებელს ძალიან მოეწონება", — აღნიშნა მან.

სერიალის სიუჟეტი მოგვითხრობს გამოძიების ფედერალური ბიუროს (FBI) ყოფილ აგენტ მეტ ვოლფზე (ჰარბორი), რომელიც ამჟამად უსაფრთხოების ექსპერტია. როდესაც მეტის ქალიშვილი — თავადაც FBI-ის აგენტი რებეკა (ბრაუნი) — ერთ-ერთი მისიის დროს უგზო-უკვლოდ იკარგება, ვოლფს უწევს დაბრუნდეს სამყაროში, რომელიც სამუდამოდ მიატოვა.

Godzilla: King of the Monsters-ში დებიუტის შემდეგ მილიმ არაერთ მხატვრულ ფილმში მიიღო მონაწილეობა: Enola Holmes, Godzilla vs Kong, Damsel, The Electric State. 1-ელ ივლისს ბრაუნს Enola Holmes-ის მესამე ნაწილშიც ვიხილავთ.

ფოტო: Netflix

რაც შეეხება დევიდ ჰარბორს, მისი ბოლო სრულმეტრაჟიანი ფილმი 2025 წელს გამოსული Thunderbolts იყო. მსახიობმა ასევე გაახმოვანა პერსონაჟი ტაირი დილიჰეის ანიმაციაში Goat. სამომავლოდ ჰარბორის მონაწილეობითაც ველოდებით რამდენიმე ფილმის პრემიერას, მათ შორის: Violent Night 2, Avengers: Doomsday, John Rambo, Evil Genius და A Head Full of Ghosts.

ფოტო: Marvel