ევროპის საბჭოს მინისტრთა კომიტეტმა საქართველოს მიერ "მაქარაშვილის ჯგუფის" საქმეების აღსრულების პროგრესი შეაფასა და ხელისუფლებას შეკრების თავისუფლების შემზღუდავი კანონმდებლობისა და პრაქტიკის საფუძვლიანი გადახედვისკენ მოუწოდა. ამის შესახებ საქართველოს ახალგაზრდა იურისტთა ასოციაცია აცხადებს.

საიას ინფორმაციით, კომიტეტი განსაკუთრებულ შეშფოთებას გამოხატავს საქართველოში მოქმედი საკანონმდებლო და პრაქტიკული გარემოს გამო, რომელიც, მათი შეფასებით, შეკრებისა და გამოხატვის თავისუფლებაზე "მსუსხავ ეფექტს" ახდენს.

"კომიტეტი ღრმა შეშფოთებას გამოთქვამს საქართველოში მოქმედი იმ კანონმდებლობისა და პრაქტიკის გამო, რომელიც შეკრების თავისუფლებით სარგებლობაზე მსუსხავ ეფექტს ახდენს და ზღუდავს გამოხატვის თავისუფლებას. მინისტრთა კომიტეტმა ხელისუფლებას მოუწოდა, საფუძვლიანად გადახედოს შეკრების თავისუფლების შემზღუდავ კანონმდებლობასა და პრაქტიკას და ევროპული კონვენციის სტანდარტებს შეუსაბამოს," — წერია განცხადებაში.

საიას ცნობით, მინისტრთა კომიტეტმა ასევე ხაზი გაუსვა სამოქალაქო საზოგადოების როლს და სახელმწიფოს შესაბამისი გარემოს შექმნისკენ მოუწოდა.

"მინისტრთა კომიტეტმა ასევე ხაზი გაუსვა სამოქალაქო საზოგადოების როლს კონვენციასთან შესაბამისობის მონიტორინგში და სახელმწიფოს მოუწოდა, უზრუნველყოს სრულად ხელსაყრელი გარემო იმ ორგანიზაციების ეფექტიანი საქმიანობისთვის, რომლებიც შეკრების თავისუფლების მონიტორინგს ახორციელებენ და პროტესტის მონაწილეებს იურიდიულ დახმარებას უწევენ," — წერს საია.

ორგანიზაციის შეფასებით, კომიტეტის გადაწყვეტილება ეფუძნება საქართველოში შეკრებებისა და მანიფესტაციების მარეგულირებელი კანონმდებლობის გამკაცრებასა და მისი გამოყენების პრაქტიკასთან დაკავშირებულ პრობლემებს. საია აღნიშნავს, რომ სახელმწიფოს არ წარუდგენია ინფორმაცია იმ ნაბიჯების შესახებ, რომლებიც სამართალდამცავი და სასამართლო პრაქტიკის ევროპულ სტანდარტებთან შესაბამისობის უზრუნველსაყოფად გადაიდგა.

ამასთან, განცხადებაში ნათქვამია, რომ 2025 წელს შეკრების თავისუფლების კონტექსტში ჩადენილი სამართალდარღვევებისთვის სანქციები კიდევ უფრო გამკაცრდა.

"მეტიც, 2025 წელს შეკრების თავისუფლების კონტექსტში ჩადენილი სამართალდარღვევებისთვის გათვალისწინებული სანქციები კიდევ უფრო გაიზარდა, ხოლო ალტერნატიული სანქციების გამოყენების შესაძლებლობა შეიზღუდა," — აღნიშნავს ორგანიზაცია.

საია ასევე მიუთითებს, რომ სახელმწიფომ მინისტრთა კომიტეტს საქმეების აღსრულების ანგარიშში განუცხადა, თითქოს მაქარაშვილის ჯგუფში გაერთიანებული საქმეები სისტემურ პრობლემებს არ ასახავდა და მხოლოდ იზოლირებულ დარღვევებს შეეხებოდა. მიუხედავად ამისა, ორგანიზაციის თქმით, ხელისუფლებას არ წარმოუდგენია კონკრეტული ღონისძიებები, რომლებიც შეკრებისა და გამოხატვის თავისუფლების მდგომარეობის გაუმჯობესებას დაადასტურებდა.

საიასა და სოციალური სამართლიანობის ცენტრის მიერ მინისტრთა კომიტეტისთვის წარდგენილ ანგარიშში აღნიშნულია, რომ 2024-2025 წლებში მიღებულმა საკანონმდებლო ცვლილებებმა მნიშვნელოვნად გააუარესა შეკრებისა და გამოხატვის თავისუფლების დაცვის სტანდარტები.

"2024-2025 წლებში მმართველი პარტიის მიერ არადემოკრატიული და დაჩქარებული წესით მიღებულმა საკანონმდებლო ცვლილებებმა შეკრებისა და გამოხატვის თავისუფლებებით სარგებლობის პრაქტიკული კრიმინალიზება მოახდინა," — წერია განცხადებაში.

საიას განცხადებით, მინისტრთა კომიტეტის მიერ მაქარაშვილის ჯგუფის საქმეების აღსრულების პროგრესის მომდევნო განხილვა 2027 წლის ივნისში გაიმართება. ორგანიზაცია აცხადებს, რომ გააგრძელებს საქართველოში სამოქალაქო უფლებების მდგომარეობის მონიტორინგსა და საერთაშორისო ადვოკატირებას შეკრების თავისუფლების სტანდარტების გაუმჯობესებისა და ხელისუფლების ანგარიშვალდებულების უზრუნველსაყოფად.