არ გსურთ, მთელი ზაფხული იმის ყურებაში დაკარგოთ, როგორ დაგორავს ბურთი მწვანე მოედანზე? ნუ ღელავთ, სერიალების მოყვარულებს წინ საოცარი თვეები გველოდება. აი, ის სერიალები, რომლებიც ამ ზაფხულს არ უნდა გამოტოვოთ:

1. House of the Dragon, სეზონი 3

დრაკონის სახლი წელს ცოტა არ იყოს რთულ მდგომარეობაში აღმოჩნდა, რადგან ბევრად დინამიკურმა და იუმორისტულმა სერიალმა — შვიდი სამეფოს რაინდმა (A Knight of the Seven Kingdoms) — სამეფო კარის თამაშების საუკეთესო სპინოფის ტიტული ჩამოართვა. თუმცა, ნაადრევ დასკვნებს ნუ გამოვიტანთ, რადგან დრაკონის სახლს მასშტაბურობა და სანახაობრიობა ნამდვილად არ აკლია, ამას კი ახალი მსახიობი, ჯეიმს ნორტონიც ემატება.

პრემიერა: Sky Atlantic/Now/HBO Max, 21 ივნისი

2. The Bear, სეზონი 5

The Bear ბოლო წლების განმავლობაში არც ისე წარმატებული იყო, თუმცა მაყურებელი ბოლო სეზონს მაინც იმედიანად ელოდება. ბოლოდროინდელმა სპეციალურმა ეპიცოდმა — Gary — დიდი პოტენციალი აჩვენა, წლევანდელი სიუჟეტი კი, როგორც ჩანს, თავად რესტორნის აღსასრულს ეხება. დაუბრუნდება სერიალი ძველ დიდებას? ამას 25 ივნისს გავიგებთ.

პრემიერა: Disney+, 25 ივნისი

3. Elle, სეზონი 1

Legally Blonde-ის პრიქველს მალე სერიალის სახით ვიხილავთ. ჰარვარდის იურიდიული ფაკულტეტის მომავალი სტუდენტის, ელა ვუდსის როლს ლექსი მინეტრი ასრულებს. სერიალის სიუჟეტი გვიყვება იმ პერიოდზე, როცა ელი ჯერ კიდევ სკოლაში სწავლობდა.

პრემიერა: Amazon Prime Video, 1-ელი ივლისი

4. Lucky, სეზონი 1

ბესტსელერებზე დაფუძნებული კრიმინალური ავანტიურები დღესდღეობით იმდენად ხშირად ხვდება ეკრანებზე, რომ ეს ჟანრი საკმაოდ გაცვეთილ კატეგორიად იქცა. თუმცა, ამ კონკრეტული სერიალის არსებობას ალბათ მისი შთამბეჭდავი სამსახიობო შემადგენლობაც კი ამართლებს: მთავარ როლში ანია ტეილორ-ჯოის ვიხილავთ, მასთან ერთად კი ეკრანზე ისეთი ვარსკვლავები გამოჩნდებიან, როგორებიც არიან ანეტ ბენინგი, ტიმოთი ოლიფანტი, ანჟანუ ელის-ტეილორი, უილიამ ფიხტნერი და ერიკ ლანგი. შოუს ავტორი ჯონათან ტროპერია, რომელმაც სერიალი მარისა სტეპლის ამავე სახელწოდების რომანის მიხედვით შექმნა.

პრემიერა: Apple TV, 15 ივლისი

5. Ride or Die, სეზონი 1

სერიალი, რომელიც ჯეიმს ბონდის სტილში, ალპებში თხილამურებით გაქცევის სცენით იწყება, მაყურებელს ულამაზესი ევროპული პეიზაჟების ფონზე ექშენ-კომედიის სამყაროში ეპატიჟება. Ted Lasso-ს ვარსკვლავი, ჰანა უედინგემი, მკვლელის როლს ასრულებს, ხოლო ოქტავია სპენსერი მისი საუკეთესო მეგობარია, რომელიც კრიმინალური ისტორიებითაა გატაცებული. რაც შეეხება შეუდარებელ ბილ ნაის, ის განასახიერებს პერსონაჟს, სახელად დირექტორი.

პრემიერა: Amazon Prime Video, 15 ივლისი

6. The Five Star Weekend, სეზონი 1

მას შემდეგ, რაც ჰოლის პარტნიორი გარდაიცვლება, ქალი გადაწყვეტს, ყველა თავისი საუკეთესო მეგობარი ნანტაკეტში მდებარე საზაფხულო სახლში დაპატიჟოს.

სერიალის სამსახიობო შემადგენლობა ნამდვილად შთამბეჭდავია — ჯენიფერ გარნერიდან და რეჯინა ჰოლიდან დაწყებული, ჯემა ჩანითა და ქლოი სევინით დამთავრებული. წინ ინტრიგებითა და ჭორებით სავსე, სანახაობრივი ისტორია გველოდება. სერიალი ელინ ჰილდერბრანდის რომანს ეფუძნება.

პრემიერა: Sky/Now, 16 ივლისი

7. Stuart Fails to Save the Universe, სეზონი 1

The Big Bang Theory-ის მეორეხარისხოვანი პერსონაჟები ყოველთვის ბევრად უფრო რეალისტური ნერდები ჩანდნენ, ვიდრე მთავარი გმირები. ეს ახალი სპინოფიც სწორედ მათ გარშემო ვითარდება: კომიქსების მაღაზიის მფლობელი სტიუარტი (კევინ სუსმანი), მისი ასისტენტი და შეყვარებული დენიზი (ლორენ ლაპკუსი), მუდამ მოწყენილი გეოლოგი ბერტი (ბრაიან პოსენი) და აუტანელი კრიპკე (ჯონ როს ბოუი). თუმცა, ამჯერად ყველაფერი იცვლება — ალტერნატიულ რეალობაში ისინი ნამდვილი მძაფრსიუჟეტიანი ფილმის გმირები ხდებიან.

პრემიერა: HBO Max, 23 ივლისი

8. Furious, სეზონი 1

ელიზაბეთ მერივეთერის ახალი შოუ გამოძიების ფედერალური ბიუროს (FBI) აგენტზე — ემი როსუმზე — გვიყვება, რომელიც სერიულ მკვლელ ქალზე ნადირობს. ამ უკანასკნელის როლს ლოლა პეტიკრუ ასრულებს, რომელმაც მანამდე თავი ბრწყინვალედ წარმოაჩინა ჩრდილოეთ ირლანდიის კონფლიქტზე გადაღებულ დრამებში — Say Nothing და Trespasses.

პრემიერა: Disney+, 27 ივლისი

9. Ted Lasso, სეზონი 4

პოპულარული საფეხბურთო კომედია ეკრანებზე მეოთხე, ფინალური სეზონით ბრუნდება — და ამჯერად კლუბი რიჩმონდი (AFC Richmond) ქალთა გუნდს აყალიბებს.

მას შემდეგ, რაც ტედი (ჯეისონ სუდეიკისი) ამერიკაში დაბრუნდა, სამი წელი გავიდა, თუმცა ახლა ამ გულუბრყვილო და კეთილ მწვრთნელს კვლავ დიდ ბრიტანეთში წასვლაზე ითანხმებენ. ის მზადაა, მეორე დივიზიონში საუკეთესო გუნდი შეკრიბოს. თუმცა, საფეხბურთო ვნებების მიღმა, მაყურებელს სხვა რამეც აინტერესებს: იქნებიან თუ არა ერთად მუდამ უკმაყოფილო როი კენტი (ბრეტ გოლდსტეინი) და საყვარელი კილი ჯონსი (ჯუნო ტემპლი).

პრემიერა: Apple TV, 5 აგვისტო

10. Widow’s Bay, სეზონი 1

ვითომ ესაა წლის საუკეთესო შოუ? სრულიად შესაძლებელია. Widow’s Bay ერთდროულად Lost-ის, Twin Peaks-სა და Parks and Recreation-ის ნაზავია. ერთი მხრივ, ეს არის საოფისე კომედია დემონური ძალების ტყვეობაში მოქცეული კუნძულის მმართველობაზე. მეორე მხრივ კი — ერთ-ერთი ყველაზე მართლაც საზარელი საშინელებათა სერიალია.

ფინალური ეპიზოდი ნელ-ნელა გვიახლოვდება და მთავარი კითხვა ასეთია: შოუში, სადაც უკვე გვყავს მკვლელი კლოუნები და ზღვის ალქაჯები, მეტი რა სიურპრიზის შემოთავაზება შეუძლიათ ავტორებს ჩვენთვის?

პრემიერა: Apple TV, უკვე ხელმისაწვდომია