ოკუპირებული ცხინვალის დე ფაქტო პრემიერმინისტრი ძამბოლატ ტადტაევი გადადგა. ოკუპირებული ცხინვალის დე ფაქტო საინფორმაციო სააგენტო "რესის" ცნობით, თედეევის გადადგომა "მთავრობის" სხდომაზე გახდა ცნობილი და მან გადადგომის შესახებ ე.წ. პრეზიდენტ ალან გაგლოევს პირადად განუცხადა.

"რესის" განცხადებით, "მთავრობა სრულად და მოქმედი კანონმდებლობის შესაბამისად გააგრძელებს ფუნქციონირებას მანამ, სანამ პარლამენტი ახალ პრემიერმინისტრს არ დაამტკიცებს". თედეევის ნაცვლად მის მოვალეობას მისი პირველი მოადგილე კონსტანტინე ჯიოევი შეასრულებს.

გაგლოევმა პრემიერმინისტრის კანდიდატურად დე ფაქტო პარლამენტს მარატ კამბოლოვი წარუდგინა. დე ფაქტო პარლამენტს კამბოლოვის კანდიდატურის განსახილველად 1 კვირა აქვს.

"სამხრეთ ოსეთის კონსტიტუციის 50-ე მუხლის მე-5 პუნქტის შესაბამისად, რესპუბლიკის პარლამენტს დასამტკიცებლად წარვუდგენ მარატ არკადიევიჩ კამბოლოვის კანდიდატურას სამხრეთ ოსეთის რესპუბლიკის პრემიერმინისტრის თანამდებობაზე," — ვკითხულობთ გაგლოევის განცხადებაში.

ვინ არის მარატ კამბოლოვი?

27 მაისს ცხინვალის დე ფაქტო პრეზიდენტმა, ალან გაგლოევმა ხელი მოაწერა განკარგულებას, რომლის მიხედვითაც მარატ კამბოლოვი "სამხრეთ ოსეთის პრეზიდენტის სახელმწიფო მრჩევლად" დაინიშნა.

"რესის" ცნობით, კამბოლოვის მოვალეობაა "სამხრეთ ოსეთის რესპუბლიკასა და რუსეთის ფედერაციას შორის ეკონომიკურ და სოციალურ სფეროებში მოკავშირეობრივი თანამშრომლობის გაღრმავების შესახებ შეთანხმების განხორციელებას" უხელმძღვანელოს.

"რადიო თავისუფლება" ექსპერტებზე დაყრდნობით წერს, რომ მარატ კამბოლოვს რუსეთის ფედერაციის ფედერალურ ხელისუფლებაში მუშაობის მრავალწლიანი გამოცდილება აქვს და მისი კარიერა "თითქმის მთლიანად რუსეთის ფედერალურ სახელმწიფო სამსახურს უკავშირდება".