"საქართველოს ახალგაზრდა იურისტთა ასოციაციის" (საიას) თავმჯდომარე, თამარ ონიანი სოციალურ ქსელში გორში, სამართალდამცავების მხრიდან პაპუნა ლოცულაშვილზე ძალადობას გამოეხმაურა. მისი განმარტებით, აღნიშნულ საქმეზე გამოძიების კვალიფიკაცია უნდა შეიცვალოს.

თამარ ონიანი ხაზს უსვამს, რომ წლების განმავლობაში პრობლემას წარმოადგენს მსგავსი დანაშაულების სამსახურებრივი უფლებამოსილების გადამეტების მუხლით (სსკ-ის 333-ე მუხლი) გამოძიება, რაც საზოგადოებაში ძალადობის ნორმალიზებას ახდენს და დაზარალებულის უფლებებს ლახავს.

უფლებადამცველი საკუთარ განცხადებაში დეტალურად განმარტავს იმ ნეგატიურ შედეგებს, რასაც პროკურატურის მხრიდან არასწორი კვალიფიკაციის გამოყენება იწვევს

"პროკურატურამ უნდა შეცვალოს დაზარალებულ პაპუნა ლოცულაშვილის საქმეზე გამოძიების კვალიფიკაცია.

ამ საკითხზე ერთმნიშვნელოვანია პასუხი.

როცა წამებას წამებას არ არქმევ, როცა დამამცირებელ ან არაადამიანურ მოპყრობას ასეთად არ აფასებ, საზოგადოებასაც არასწორ წარმოდგენას უყალიბებ, რომ თითქოს ცემა და ძალადობა საპოლიციო მოქმედების თანმდევი ნორმაა, სადაც თუ თითქოს საჭირო და აუცილებელ ძალას გადაამეტებენ, დაისჯებიან, როგორც უფლებამოსილების გადამეტებაში დამნაშავეები. [ეს წლებია პრობლემაა].

როდესაც წამებასა და არასათანადო მოპყრობის სხვა ფორმებს პროკურატურა არასწორი კვალიფიკაციით იძიებს [სსკ 333], პრობლემურია, მათ შორის, შემდეგი საკითხები:

(1) საქმეზე არსებული მტკიცებულებების რეალური სამართლებრივი შეფასება არ ხდება შესაბამისი სტანდარტებით;

(2)გამოძიების კვალიფიკაცია გავლენას ახდენს გამოძიების ფარგლებზე — ჩატარდეს ან არ ჩატარდეს კონკრეტული საგამოძიებო მოქმედებები.

(3) დაზარალებული კარგავს უფლებას, რომ მისი ტანჯვა აღიარებული და გამოძიებული იყოს როგორც წამება/არასათანადო მოპყრობა.

როდესაც არსებობს დასაბუთებული მტკიცება, რომ სახელმწიფო მოხელეების მიერ არასათანადო მოპყრობაა ჩადენილი (ანუ ის აღწევს ასეთი ქმედების მინიმალურ ზღვარს), გამოძიება კონკრეტულად ამ კვალიფიკაციით უნდა დაიწყოს [სსკ 144 პრიმა, სეკუნდა და ტერცია მუხლები] და არა უფლებამოსილების გადამეტებით [სსკ 333] ან ნაკლებად სასტიკი მოპყრობის ზოგადი დებულებების ფარგლებში", — დაწერა თამარ ონიანმა.

პაპუნა ლოცულაშვილი თავდაპირველად სისხლის სამართლის კოდექსის 353-ე მუხლით იყო დაკავებული, რაც პოლიციის თანამშრომლისთვის წინააღმდეგობის გაწევას გულისხმობს ძალადობის მუქარით, მისი სამსახურებრივი საქმიანობის შეწყვეტის მიზნით.

შეგახსენებთ, გუშინ 27 მაისს, "ქართლის ამბებმა" გაავრცელა ვიდეო, სადაც ჩანს როგორ ძალადობს ფიზიკურად 10-მდე სამართალდამცავი ახალგაზრდა კაცზე.აღნიშნულ ფაქტზე პროკურატურამ პოლიციელთა მხრიდან სამსახურებრივი უფლებამოსილების სავარაუდო ძალადობით გადამეტების მუხლით გამოძიება უკვე დაიწყო.