ირაკლი კობახიძემ ჟურნალისტებთან საუბრისას განაცხადა, რომ მან ნახა გორში მომხდარი ინციდენტის ამსახველი კადრები და სახელმწიფო უწყებებს შესაბამისი რეაგირებისკენ მოუწოდა.

"მე ვნახე ეს კადრები. აბსოლუტურად მიუღებელი კადრებია და, რა თქმა უნდა, შესაბამის სახელმწიფო უწყებებს უნდა ჰქონდეთ და ექნებათ სათანადო რეაგირება. რა თქმა უნდა, საზოგადოება იქნება ინფორმირებული," — ირაკლი კობახიძე გორში მომხდარ ინციდენტზე.

შეგახსენებთ, "ქართლის ამბებმა" გაავრცელა ვიდეო, სადაც ჩანს როგორ ძალადობს ფიზიკურად 10-მდე სამართალდამცავი ახალგაზრდა კაცზე.

სავარაუდოდ დაკავებული პირის მეგობარი ლაშა ამისონაშვილი მედიასთან საუბრისას აცხადებს, რომ არ იცის რა მიზეზით იძალადეს პოლიციელებმა მის მეგობარზე და რატომ დააკავეს.

ამისონაშვილის განცხადებით, მისი მეგობარი 28 წლისაა, საქართველოს ბანკის თანამშრომელია და წარსულში კანონთან კონფლიქტი არასდროს ჰქონია. ის უარყოფს სამართალდამცავების ვერსიას, თითქოს მის მეგობარს ცივი იარაღი აღმოუჩინეს. მისი თქმით, როდესაც გაშველებას ცდილობდა, პოლიციელებმა მასზეც იძალადეს, თუმცა არ დაუკავებიათ.

"მანქანა მიუშვეს და მაგრად სცემეს. მერე მე ვაშველებდი. დამხმარე ძალა რომ მოვიდა, მეც ძალიან მცემეს. ჩემი მეგობარი სამსახურიდან შესვენებაზე იყო და სამსახურში ბრუნდებოდა ფეხით. მე ყვირილზე გამოვედი და სიტუაციის განეიტრალება ვცადე და ძალიან მცემეს. მე გამომიშვეს," — ამბობს ამისონაშვილი.