გორში პოლიციელების მხრიდან ფიზიკური ძალადობის მსხვერპლი, პაპუნა ლოცულაშვილი, სამკურნალოდ კლინიკა "ვივამედში" მოათავსეს. ინფორმაციას მისი ადვოკატი ლაშა ტყეშელაძე ავრცელებს.

ადვოკატის განცხადებით, დაზარალებულს სხეულზე არაერთი დაზიანება აღენიშნება, რის გამოც დამატებითი გამოკვლევები ესაჭიროება

"ჩაუტარდება სამედიცინო შემოწმება, რადგან აღენიშნება სხვადასხვა, მრავლობითი დაზიანებები. აუცილებელია ტვინის შერყევაზე შემოწმდეს და ა.შ.. ", — განაცხადა უფლებადამცველმა (კომენტარს IPN ავრცელებს).

ლაშა ტყეშელაძემ დააზუსტა, რომ სამართალდამცავთა ქმედებების შედეგად, ლოცულაშვილს ტრავმები როგორც სახის, ისე სხეულის სხვადასხვა არეში აქვს მიყენებული:

"სახეზე აღენიშნება მრავლობითი დაზიანება. ეჭვი გვაქვს, რომ შეიძლება ჰქონდეს ტვინის შერყევა. ასევე, დაზიანებული ჰქონდეს სახის ძვლები. როცა უტარდებოდა ექსპერტიზა და ცხვირზე მოკიდეს ხელი, ძალიან ეტკინა. მაშინვე თქვა ექსპერტმა , რომ უნდა გადაგვეყვანა კლინიკაში. ასევე, სხეულზე აქვს სხვადასხვა მრავლობითი დაზიანებები — სხვადასხვა არეში, ხელებზე, ფეხებზე, მუცელზე და ა.შ", — განაცხადა ადვოკატმა.

მიუხედავად იმისა, რომ ლოცულაშვილი ბრალდებულის სახით გამოიკითხა, ადვოკატი მისი სისხლისსამართლებრივი დევნის შეწყვეტას და დამნაშავე პოლიციელების დასჯას ითხოვს. მისივე თქმით, ამ დროისთვის მისი დაცვის ქვეშ მყოფი კვლავ ინარჩუნებს ბრალდებულის სტატუსს. რაც შეეხება მის გათავისუფლებას, ლაშა ტყეშელაძე აღნიშნავს, რომ საგამოძიებო უწყებამ მისი იზოლაციაში დატოვება საჭიროდ აღარ მიიჩნია.

"დაკავებული იყო. როგორც ბრალდებული გამოკითხეს. ვითხოვ დაუყოვნებლივ შეწყვიტონ აღნიშნული საქმე...დოკუმენტში წერია, რომ ბრალდებამ აღარ ჩათვალა საჭიროდ საგამოძიებო მიზნებისთვის მისი დაკავება", — განაცხადა ადვოკატმა.

ადვოკატი რევაზ რევაზიშვილი "ქართლის ამბებთან" საუბრისას ამბობს, რომ ერთ-ერთი მათგანი, რომელიც ფორმალურად ბრალდებულად ითვლება, მისი გამოკითხა ვერ მოხერხდა ჯანმრთელობის მდგომარეობის გამო, მეორე მათგანმა მომხდარის შესახებ ინფორმაცია უკვე მიაწოდა გამოძიებას.

"პროკურატურამ გამოიტანა დადგენილება, რომ არ არის აუცილებელი პაპუნა ლოცულაშვილის პატიმრობაში ყოფნა, თუმცა ფორმალურად ამ ეტაპისთვის ითვლება ბრალდებულად, მისთვის ბრალი არ წარუდგენიათ, ...ამიტომ ჩვენ ვითხოვთ, რომ საერთოდ შეწყდეს სისხლის სამართლის საქმე, რაც უკავშირდება პოლიციელების წინააღმდეგობის გაწევას", — ამბობს ადვოკატი.

პაპუნა ლოცულაშვილი თავდაპირველად სისხლის სამართლის კოდექსის 353-ე მუხლით იყო დაკავებული, რაც პოლიციის თანამშრომლისთვის წინააღმდეგობის გაწევას გულისხმობს ძალადობის მუქარით, მისი სამსახურებრივი საქმიანობის შეწყვეტის მიზნით.

შეგახსენებთ, გუშინ 27 მაისს, "ქართლის ამბებმა" გაავრცელა ვიდეო, სადაც ჩანს როგორ ძალადობს ფიზიკურად 10-მდე სამართალდამცავი ახალგაზრდა კაცზე.აღნიშნულ ფაქტზე პროკურატურამ პოლიციელთა მხრიდან სამსახურებრივი უფლებამოსილების სავარაუდო ძალადობით გადამეტების მუხლით გამოძიება უკვე დაიწყო.