8 მაისს ირაკლი კობახიძემ მთავრობის სხდომაზე განაცხადა, რომ სექტემბრიდან უწყებრივ დაქვემდებარებაში მყოფი კიდევ ერთი უმაღლესი საგანმანათლებლო დაწესებულება — საქართველოს დიპლომატიის აკადემია დაარსდება.

• საქართველოში დიპლომატიის აკადემია დაარსდება

"დიპლომატიური სამსახურის შესახებ" კანონპროექტში ვკითხულობთ, რომ დიპლომატიის აკადემია პოლიტიკის მეცნიერებებისა და საერთაშორისო ურთიერთობების საბაკალავრო და
პოლიტიკის მეცნიერებებისა და დიპლომატია-საერთაშორისო ურთიერთობების სამაგისტრო
პროგრამების სტუდენტებს მიიღებს — ეს იქნება "კვალიფიკაციის ამაღლების ერთწლიანი კურსი".

განმარტებით ბარათში ვკითხულობთ, რომ დიპლომატიის აკადემიაში სტუდენტთა
მიღება 2027 სასწავლო წლიდან იგეგმება. აკადემიაში მიღებული იქნება 70 სტუდენტი
საბაკალავრო, ხოლო 50 სტუდენტი სამაგისტრო პროგრამებზე.

"საჯარო სამართლის იურიდიული პირი - დიპლომატიის აკადემია (შემდგომში — აკადემია) — უმაღლესი საგანმანათლებლო დაწესებულება, რომელიც ახორციელებს პოლიტიკის მეცნიერებებისა და საერთაშორისო ურთიერთობების საბაკალავრო და პოლიტიკის მეცნიერებებისა და დიპლომატია-საერთაშორისო ურთიერთობების სამაგისტრო პროგრამებს;

კვალიფიკაციის ამაღლების ერთწლიანი კურსი — საგანმანათლებლო კურსი, რომლის მიზანია დიპლომატიური სამსახურის სპეციფიკის, პროფესიული ცოდნისა და უნარჩვევების შეძენა გამომუშავება, ასევე მომზადება და გადამზადება იმ საკითხებში, რომელსაც
ახორციელებს სამინისტრო," — ვკითხულობთ კანონპროექტში.

კანონის განმარტებით ბარათში ნათქვამია, რომ დიპლომატიის აკადემიაში 46 პირი დასაქმდება და შესაბამისი სახელფასო ფონდი ყოველწლიურად 1 093 350 ლარს შეადგენს.

"წარმოდგენილი კანონის პროექტის მიღება გავლენას მოახდენს სახელმწიფო ბიუჯეტის საშემოსავლო ნაწილზე. კერძოდ, წარმოდგენილი ცვლილებების ფარგლებში საჯარო სამართლის იურიდიულ პირში — დიპლომატიის აკადემიაში დასაქმდება — 46 პირი
(მათ შორის, 30 — საშტატო, 16 — შტატგარეშე. როგორც აკადემიური ისე ადმინისტრაციული პერსონალი). წინასწარი გათვლებით, შესაბამისი სახელფასო ფონდი ყოველწლიურად შეადგენს დარიცხული 1 093 350 ლარს," — ვკითხულობთ განმარტებით ბარათში.

აღნიშნული აკადემია სახელმწიფო ბიუჯეტს 2026 წლის სავარაუდო დათვლებით 3 მილიონ ლარამდე დაუჯდება.

"კანონპროექტის მიღება გავლენას იქონიებს სახელმწიფო ბიუჯეტის ხარჯვით ნაწილზე.
კერძოდ, იმის გათვალისწინებით, რომ მოცემულ ეტაპზე შესაქმნელია სასწავლო პროცესისთვის საჭირო თანამედროვე ინფრასტრუქტურა, მათ შორის სემინარებისა და ლექციებისთვის საჭირო აუდიტორიები, სიმულაციური ლაბები, ბიბლიოთეკა, IT ინფრასტრუქტურა, შესაბამისი ავეჯი და ტექნიკა, საჯარო სამართლის იურიდიული პირის —
დიპლომატიის აკადემიის 2026 წლის სავარაუდო ბიუჯეტი წინასწარი გათვლებით შეადგენს
— 2 993 675 ლარს (მათ შორის, ავტორიზაციისთვის 48 000 ლარი და აკრედიტაციისთვის 40 000 ლარი), ხოლო — 2027, 2028 და 2029 წლებში განისაზღვრება ყოველწლიურად - 2 851 350 ლარით," — ვკითხულობთ განმარტებით ბარათში.

"დიპლომატიური სამსახურის შესახებ" კანონში ცვლილების თანახმად, უმაღლესი დიპლომატიური რანგი საგარეო საქმეთა მინისტრს მიენიჭება, რაც ყოველთვიურ 1 360 ლარის ოდენობით დანამატს გულისხმობს.

"დიპლომატიური სამსახურის შესახებ" საქართველოს კანონის 34-ე მუხლით გათვალისწინებული ცვლილება ითვალისწინებს საქართველოს საგარეო საქმეთა მინისტრისთვის უმაღლესი დიპლომატიური რანგის მინიჭებას, რის საფუძველზეც მოხდება რანგის შესაბამისი დანამატის — ყოველთვიურად 1 360 ლარის გაცემა. შესაბამისად, სახელმწიფო ბიუჯეტში მოხდება საშემოსავლო გადასახადის — რანგის დანამატის 20%-ის ოდენობით (266 ლარი) გადახდა," — ვკითხულობთ განმარტებით ბარათში.

კანონპროექტის თანახმად, საგანგებო და სრულუფლებიანი ელჩის დიპლომატიური რანგი შეიძლება მიენიჭოთ:

• მინისტრს;
• მინისტრის პირველ მოადგილეს;
• მინისტრის მოადგილეს;
• იმ უმაღლესი დიპლომატიური თანამდებობის პირებს, რომლებსაც უკავიათ ან ეკავათ დიპლომატიური წარმომადგენლობის ხელმძღვანელის ან საქართველოს საგანგებო და სრულუფლებიანი ელჩის თანამდებობა.