ირაკლი კობახიძე ოფიციალური ვიზიტით აზერბაიჯანის დედაქალაქ ბაქოს ეწვია, სადაც ის მონაწილეობას მიიღებს მსოფლიო ურბანულ სამიტში, რომელიც გაეროს ადამიანთა დასახლებების პროგრამასთან (UN-Habitat) პარტნიორობით იმართება.

მთავრობის ადმინისტრაციის ცნობით, ირაკლი კობახიძე სიტყვით გამოვა მსოფლიო ურბანული ფორუმის მე-13 სესიაზე. გარდა ამისა, ვიზიტის ფარგლებში დაგეგმილია პირისპირ შეხვედრა აზერბაიჯანის რესპუბლიკის პრეზიდენტ ილჰამ ალიევთან.

მსოფლიო ურბანულ ფორუმზე, რომელშიც 180-ზე მეტი ქვეყნის ლიდერი, მსხვილი ბიზნესის წარმომადგენლები, ურბანისტები და უძრავი ქონების დეველოპერები მონაწილეობენ, ყურადღება გლობალურ გამოწვევებზე გამახვილდება.

მთავარი განსახილველი საკითხებია: კლიმატის ცვლილებებითა და კონფლიქტებით გამოწვეული გლობალური საბინაო კრიზისის გადაჭრის გზების ძიება, — წერია გავრცელებულ ინფორმაციაში.