პარტია გახარია საქართველოსთვის დეპუტატის, გიორგი შარაშიძეს განცხადებით, ოპოზიციური ალიანსის მიერ 26 მაისისთვის დაანონსებული აქცია შესაძლოა "ახალი 4 ოქტომბრის" მცდელობა იყოს. ამის შესახებ ინფორმაციას IPN ავრცელებს.

როგორც შარაშიძემ განაცხადა, მის პარტიას აღნიშნულ აქციასთან "არანაირი კავშირი" არ აქვს და 26 მაისს მხოლოდ საქართველოს დამოუკიდებლობის დღის აღნიშვნას გეგმავს.

"არანაირი კავშირი არ გვაქვს იმ ხალხთან, ვინც 26 მაისს რაღაც ტიპის აქციის მოწყობას აპირებს. ჩვენთვის 26 მაისი არის საქართველოს დამოუკიდებლობის დღე, რომელსაც ყოველთვის ქართველ ხალხთან აღვნიშნავდით. წელსაც ასე მოვიქცევით. ნებისმიერი დაპირისპირების შეტანა ამ პროცესში მიუღებელია, მით უფრო, იმ ხალხისგან, ვინც თავად არიან 4 ოქტომბრის სრულიად უპასუხისმგებლო პროვოკაციის ავტორები.

26 მაისს რუსთაველზე ყოველთვის გამოდიოდა ხალხი. ამ ხალხის გამიჯვნა და თვლა, ვიღაც თურმე ერთი კონკრეტული პოლიტიკოსის დაძახებულზე გამოვიდა და ვიღაცა საქართველოს დამოუკიდებლობის აღსანიშნავად, არასასიამოვნოა. თქვენ გსიამოვნებთ ხალხის დაყოფა იმ ნიშნით, ვინ რისთვის არის გამოსული 26 მაისს?! შეეძლოთ ნებისმიერი სხვა დღე აერჩიათ. ჩვენთვის მთავარია არა ის, რომელ საათზე გამართავენ აქციას, არამედ ის, რომ ისინი არიან 4 ოქტომბრის უპასუხისმგებლო პროვოკაციის ავტორები და მონაწილეები. ზოგი ნებსით, ზოგი უნებლიედ. თავად არ საუბრობენ, რა მოხდა 4 ოქტომბერს რეალურად და ახალი თარიღების დაანონსება, ბუნებრივია, სრულიად უპასუხისმგებლოა.

ზოგადად, რაოდენობა მნიშვნელოვანია, მაგრამ მოდი, ჯერ ვნახოთ, რას გააკეთებენ და რამდენად შეძლებენ ისინი ისეთი მასშტაბური აქციის ორგანიზებას, რომელმაც შეიძლება რაღაც გარდამტეხი როლი ითამაშოს პოლიტიკურ პროცესში და მერე ვისაუბროთ. წინასწარ ბაქი-ბუქს არავის ვურჩევ. ჩვენთვის მთავარია, რომ 26 მაისი დარჩეს ერთიანობის დღედ და საქართველოს დამოუკიდებლობის დღედ და არ იყოს ხალხში დამატებით კიდევ შეტანილი დაპირისპირება. თარიღების დაანონსება თავად ქმნის არასწორი მოლოდინების გაჩენის საფუძველს. ამ თვალსაზრისით, ეს, რა თქმა უნდა, ჰგავს 4 ოქტომბერს. ჩემთვის ჰგავს 4 ოქტომბერს და ამ ხალხმა თუ ჯერ კიდევ ვერ ისწავლა ჭკუა, მაშინ ეს მათი ძალიან დიდი პრობლემაა. მე მათ ვურჩევდი, ყველა გონს მოეგონ. ნურავინ ნუ გახდება საზოგადოების დაპირისპირების წყარო და მოტივაცია და ყველამ საკუთარი პასუხისმგებლობით აგოს პასუხი," — განაცხადა დებუტატმა.

ცნობისთვის, ოპოზიციურმა ალიანსმა 26 მაისს, რუსთაველის გამზირზე საპროტესტო აქცია დააანონსა. ამის შესახებ განცხადება ალიანსმა სოციალურ ქსელში გაავრცელა.

"4 ოქტომბერს დაკავებულების მიმართ დღეს გამოტანილი განაჩენი არ არის მართლმსაჯულების აქტი. ეს არის რეჟიმის მიერ გაფორმებული პოლიტიკური ანგარიშსწორება, რომელსაც სამართალთან საერთო არაფერი აქვს.
ყველა დაკავებული პირი არის პოლიტიკური პატიმარი და დღევანდელი გადაწყვეტილება მხოლოდ რეჟიმის პასუხისმგებლობას ამძიმებს.

ამ უკანონობასთან ბრძოლის ჩვენი მთავარი გზა მშვიდობიანი პროტესტია!

სწორედ ამიტომ, 26 მაისს, დამოუკიდებლობის დღეს, ვიკრიბებით რუსთაველის გამზირზე.

ეს არის ბრძოლა ჩვენი მოქალაქეების თავისუფლებისთვის!

გელოდებით ყველას 26 მაისს, 19:00 საათზე გამარჯვებისთვის - ერთად, ბოლომდე!"— ვკითხულობთ განცხადებაში.

შეგახსენებთ, რომ სტრატეგიული და განსაკუთრებული მნიშვნელობის მქონე ობიექტის ხელში ჩაგდების მცდელობის, ჯგუფური ძალადობის ორგანიზების, ხელმძღვანელობის და მასში მონაწილეობის, ასევე საქართველოს კონსტიტუციური წყობილების ძალადობით შეცვლისაკენ და სახელმწიფო ხელისუფლების დამხობისაკენ საქვეყნოდ მოწოდების ბრალდებით 4 ოქტომბრის საქმის ორგანიზატორები — პაატა ბურჭულაძე, მურთაზ ზოდელავა, ლაშა ბერიძე, ირაკლი ნადირაძე, პაატა მანჯგალაძე, ირაკლი შაიშმელაშვილი, თორნიკე მჭედლიშვილი, ნიკა გვენცაძე, ირაკლი ჩხვირკია და გური ჟვანია — სასამართლომ დამნაშავედ ცნო.