"ხვალ საქართველოს ეკლესიას ეყოლება ახალი კათოლიკოს-პატრიარქი", — ამის შესახებ გუშინ, 10 მაისს, საპატრიარქოს საზოგადოებასთან ურთიერთობის სამსახურის ხემლძღვანელმა, დეკანოზმა ანდრია ჯაღმაიძემ განაცხადა და 11 მაისს დაგეგმილ გაფართოებულ კრებასთან დაკავშირებით რამდენიმე საკითხი დააზუსტა. მისი თქმით, რიგით მეთოთხმეტე გაფართოებულ კრებაზე პატრიარქობის სამი კანდიდატიდან ერთ-ერთს შეარჩევენ.

"მოგეხსენებათ, რომ ხვალ მართვა-გამგეობის დებულების შესაბამისად, ჩანიშნულია გაფართოებული კრება. გაფართოებული კრება ნომერით არის მეთოთხმეტე და იქნება კენჭისყრა ამ კრებაზე სამი საპატრიარქო კანდიდატიდან ერთ-ერთის შესარჩევად. ხვალ საქართველოს ეკლესიას ეყოლება ახალი კათოლიკოს-პატრიარქი და ეს არის ძალიან მნიშვნელოვანი მოვლენა", — განაცხადა ანდრია ჯაღმაიძემ.

მამა ანდრია ჯაღმაიძემ ღონისძიების საორგანიზაციო დეტალებზე ისაუბრა.

ტაძარში შესვლა მხოლოდ სპეციალური სიებით შედგენილი 1 200 დელეგატისთვის იქნება შესაძლებელი. სტუმრების 10:00-დან 12:00 საათამდე მიიღებენ. ტაძრის მიმდებარედ ავტომობილებით გადაადგილება შეიზღუდება.

ანდრია ჯაღმაიძის ინფორმაციით, პირდაპირ ეთერში კრების გახსნას "პირველი არხი" გააშუქებს, კენჭისყრასა და შედეგების გამოცხადებას. მობილური ტელეფონების გამოყენება მკაცრად შეიზღუდება. ასევე, არ გაშუქდება ხმის დათვლის პროცესი.

საპატრიარქოს საზოგადოებასთან ურთიერთობის სამსახურის ხელმძღვანელმა ასევე განმარტა, რომ ბიულეტენში სამი კანდიდატი იქნება მითითებული. ხმის მიცემა ფარულია, შედეგებს კი საზოგადოებას მანგლისისა და თეთრი წყაროს მიტროპოლიტი ანანია (ჯაფარიძე) გააცნობს.

ანდრია ჯაღმაიძემ ასევე აღნიშნა, რომ სხდომაზე სიტყვით გამოვლენ თავად კანდიდატები და მათი ეპარქიის წარმომადგენლები. ასევე, ერთ-ერთი მეცნიერი, რომელიც პატრიარქის ტიტულთან დაკავშირებით ისტორიული მიმოხილვას წარადგენს.

შეგახსენებთ, რომგაფართოებული კრება დღეს, 11 მაისს, 13:00 საათზე თბილისში, ყოვლადწმინდა სამების სახელობის საპატრიარქო ტაძარში გაიმართება. კენჭისყრა სამ კანდიდატს შორის გაიმართება, რომლებიც 28 აპრილს საპატრიარქოში გამართულ სინოდის სხდომაზე შეირჩნენ. ესენი არია: სენაკისა და ჩხოროწყუს მიტროპოლიტი და საპატრიარქო ტახტის მოსაყდრე შიო, მროველ-ურბნელი მიტროპოლიტი იობ აქიაშვილი და ფოთისა და ხობის მიტროპოლიტი გრიგოლ ბერბიჭაშვილი. კენჭისყრაზე გამარჯვებისთვის საჭიროა, რომ სამი კანდიდატიდან რომელიმემ მოაგროვოს 39 ხმიდან ნახევარზე მეტი, 20 ხმა. 28 აპრილს გამართულ სინოდის სხდომაზე საპატრიარქო ტახტის მოსაყდრე შიომ 20 ხმა მიიღო, მიტროპოლიტებმა გრიგოლმა და იობმა 7-7 ხმა.

საპატრიარქოს ცნობით, მორწმუნეებს სამების ტაძრის ეზოში ფეხით შესვლა შეუფერხებლად შეეძლებათ. მათივე ცნობით, ეზოში დიდი ეკრანებია დამონტაჟებული, საიდანაც საზოგადოებას შეეძლება, თვალი ადევნოს კრების მუშაობას.