"იყო გარკვეული არაკორექტული გამოსვლები, ემოციური კომენტარებიც, მიუხედავად ამისა, სინოდი იყო ერთსულოვანი, რომ არჩევნები იქნება სანიმუშო", — ეს განცხადება საპატრიარქოს საზოგადოებასთან ურთიერთობის სამსახურის უფროსმა, დეკანოზი ანდრია ჯაღმაიძემ მას შემდეგ გააკეთა რაც ცნობილი გახდა, რომ გაფართოებული კრება, სადაც ახალი პატრიარქი უნდა აირჩიონ 11 მაისს სამების საკათედრო ტაძარში გაიმართება.

მისივე თქმით, "მცდელობები, რომ ეპისკოპოსებს შორის დაპირისპირება წარმოაჩინონ, არარეალურია".

"საზოგადოება მიჩვეულია საერო არჩევნებს და იქ მომხდარ დაპირისპირებებს, სინოდში ასეთი რამ არ ხდება. მიუხედავად იმისა, რომ იყო გარკვეული არაკორექტული გამოსვლები, ემოციური კომენტარებიც, მიუხედავად ამისა, დღევანდელი სინოდი, შეიძლება ითქვას, იყო ერთსულოვანი და ორიენტირებული იმაზე, რომ როგორც აქამდე, პატრიარქის გარდაცვალების შემდეგ, მთელი ეს პერიოდი, ღირსეულად ტარდებოდა სინოდი იქნებოდა თუ სხვა პროცესიები, ასევე სამაგალითო და სანიმუშო იქნება ეს არჩევნებიც. ეს იყო მთავარი მათი სულისკვეთება, ხოლო დანარჩენი მცდელობები, რომ ეპისკოპოსებს შორის დაპირისპირება წარმოაჩინონ, არარეალურია", — განაცხადა დეკანოზმა ანდრია ჯაღმაიძემ.

რაც შეეხება სამიდან ერთ-ერთი პატრიარქობის კანდიდატის, ურბნისისა და რუისის ეპარქიის მიტროპოლიტ იობის დიპლომის დაკარგვის ფაქტს, დეკანოზმა განაცხადა, რომ "ზედმეტი აჟიოტაჟი იყო".

"დიპლომის მოპარვასთან დაკავშირებით ზედმეტი აჟიოტაჟი იყო, დაიკარგა ეს დიპლომი თუ მოიპარეს. ჩვენ ხომ ყველას გვესმის, რომ დიპლომი არ არის ცარიელი ყდები და ფურცელი, ეს არის არქივში ჩანაწერები და ადამიანი რომ კარგავს პირადობის მოწმობას თუ მართვის მოწმობას, ამის აღდგენა სრულიად შესაძლებელია და ახლიდან არ აბარებინებენ გამოცდებს", — განაცხადა დეკანოზმა ანდრია ჯაღმაიძემ.

მას ჟურნალისტებმა დმანისისა და აგარაკ-ტაშირის მთავარეპისკოპოსმა ზენონის მიერ გაკეთებულ განცხადებებზეც დაუსვეს კითხვა. რომელმაც 6 მაისს "ტვ პირველის" ეთერში თქვა, რომ საპატრიარქოში არაფორმალური ე.წ. "ენდემოსას სინოდი" არსებობს.

"სრულიად არაკორექტული იყო მსგავსი აზრები გავრცელება რადგან საპატრიარქოში კათოლიკოს-პატრიარქის მმართველობის პერიოდში არც ერთი ნაბიჯი, არც ერთ განცხადება არ გაკეთებულა მასთან შეუთანხმებლად. ასეთი კონსპირაციები გვესმის და შეიძლება მასაც უთხრა ვიღაცამ, მაგრამ რეალურად ასეთი რამ არ ხდება", — განაცხადა დეკანოზმა ანდრია ჯაღმაიძემ.

დმანისისა და აგარაკ-ტაშირის მთავარეპისკოპოსმა ზენონმა "ტვ პირველის" ეთერში საუბრისას ისიც თქვა, რომ "მეუფე შიო საშიშია საქართველოს ეკლესიისთვის პატრიარქად". მისივე თქმით, "ამ ადამიანმა [მეუფე შიომ] დაანახა, რომ არის უსამართლო, მსჯავრი არ აქვს მას სამართლით უამრავ რაღაცაში".