წინა კვირას, კანადის ქალაქ ვანკუვერში, ფეხბურთის ასოციაციათა საერთაშორისო ფედერაციის (FIFA) რიგით 76-ე კონგრესი გაიმართა, სადაც წევრი ქვეყნების ასობით წარმომადგენელი იყო ჩასული. ღონისძიების მიმდინარეობისას, ფედერაციის პრეზიდენტმა ჯანი ინფანტინომ ისრაელისა და პალესტინის წარმომადგენლები სცენაზე მიიწვია და შეეცადა, მათ ერთმანეთისთვის ხელი ჩამოერთმიათ. თუმცა, პალესტინის საფეხბურთო ასოციაციის პრეზიდენტმა ჯიბრილ რაჯუბმა მტკიცე უარით უპასუხა შეთავაზებას, მისალმებოდა ისრაელის საფეხბურთო ასოციაციის ვიცე-პრეზიდენტს, ბასიმ შეიხ სალიმანს.

"ხელს ვერ ჩამოვართმევ მას, ვინც ისრაელელებმა საკუთარი ფაშიზმისა და გენოციდის გადასაფარად გამოგზავნეს. ჩვენ ვეწამებით", — განაცხადა რაჯუბმა, რომელიც პალესტინური ქუფიით იყო შემოსილი.

კონგრესის დაწყებამდე პალესტინის წარმომადგენელმა FIFA-ს ასევე მოუწოდა, გამოხმაურებოდა ისრაელის მიერ ფედერაციის წესების შესაძლო დარღვევას. უკვე წლებია, პალესტინა ამტკიცებს, რომ ისრაელი ეროვნულ ლიგაში მონაწილეობის ნებას რთავს კლუბებს ოკუპირებული დასავლეთ სანაპიროდან, რითაც FIFA-ის რეგულაციებს არღვევს. რაჯუბის თქმით, იგი ფედერაციას და მის გადაწყვეტილებებს პატივს სცემს, მაგრამ მიაჩნია, რომ "ისრაელი FIFA-ის წესებისა დარღვევისა და ადამიანის უფლებების ხელყოფის გამო უნდა დასანქცირდეს".

"მე ვსაუბრობ მათი სახელით, ვისი ხმაც ახლა ამ დარბაზში არ ისმის: პალესტინელი ბავშვების, ფეხბურთელების, მწვრთნელებისა და მსაჯების, რომლებსაც უკვე დიდი ხანია, საკუთარ მიწაზე ფეხბურთის თამაშის უფლება წართმეული აქვთ", — განაცხადა რაჯუბმა სიტყვით გამოსვლისას, — "ვსაუბრობ იმ ბავშვის სახელით, რომელმაც თანაგუნდელი დაკარგა, ოჯახის სახელით, რომელმაც შვილი დაკარგა, გუნდის სახელით, რომელიც მოედნის გარეშე დარჩა და იმ ხალხის სახელით, რომელიც ფეხბურთის თამაშის სიხარულსაა მოკლებული".

ფედერაციის პრეზიდენტმა რაჯუბს და სალიმანს ტრიბუნიდან თანამშრომლობისკენ მოუწოდა: "მოდით, ერთად შევეცადოთ, რომ ბავშვების იმედად ვიქცეთ". თუმცა, პალესტინელმა ინფანტინოს ხელი ჩამოართვა და სცენიდან ჩავიდა.

"ჯანის უფლება აქვს, ხიდის გადებას და ხალხის გაერთიანებას შეეცადოს. ვფიქრობ, შეიძლება ესმის, მაგრამ არ იცის, რამხელა ტანჯვას გადის პალესტინელი ხალხი და პალესტინური სპორტული ოჯახი", — აღნიშნა რაჯუბმა.

კონგრესის დასასრულს, ჯანი ინფანტინომ განაცხადა, რომ მომავალ წელს ისევ იყრის კენჭს FIFA-ის პრეზიდენტობაზე და შეეცდება, მესამე ვადით მოიპოვოს ფედერაციის ხელმძღვანელობის უფლება. ზოგიერთის შეფასებით, ინფანტინო, რომელმაც შარშან FIFA-ის მშვიდობის პრიზი დააფუძნა და მერე ამ პრიზით დონალდ ტრამპი დააჯილდოვა, ამჯერადაც შეეცადა, საკუთარი კანდიდატურის დასახელებამდე შემრიგებლური ფოტო "დაედგა".