საქართველოს ახალგაზრდა იურისტთა ასოციაციამ ანტიკორუფციული ბიუროს გაუქმებასა და მისი კომპეტენციის აუდიტის სახელმწიფო სამსახურისთვის გადაცემასთან დაკავშირებით შეფასება გამოაქვეყნა.

აღნიშნული შეფასების მიზანს საქართველოში ბოლო წლებში არსებული ანტიკორუფციული პოლიტიკის მიმოხილვა და ბოლო ცვლილებების მიზეზებისა და შესაძლო შედეგების განხილვა წარმოადგენდა.

მათი თქმით ანტიკორუფციული პოლიტიკა არასდროს ყოფილა საქართველოს ხელისუფლების განსაკუთრებული პრიორიტეტი. თუმცა, ანტიკორუფციული ბიუროს შექმნა, თავისთავად, იყო იმ საერთაშორისო რეკომენდაციების გათვალისწინება/შესრულება, რომლებმაც ქვეყანა, გარკვეულწილად, ევროკავშირის კანდიდატი ქვეყნის სტატუსამდე მიიყვანა.

შეფასებაში ასევე ნახსენებია რომ ბოლოდროინდელი რეპრესიული კანონმდებლობის შედეგად ბიურო, საჯარო სექტორის მონიტორინგის ნაცვლად, სამოქალაქო საზოგადოების ზედამხედველ ორგანოდ გადაიქცა, როდესაც ის გახდა პასუხისმგებელი ე.წ. ამერიკული FARA-ს ქართული ანალოგისა თუ "გრანტების შესახებ" კანონის აღსრულებაზე.

"როგორც საზოგადოებისთვის ცნობილია, საქართველოს პარლამენტმა გააუქმა კორუფციასთან ბრძოლის პრევენციული ორგანო — ანტიკორუფციული ბიურო და მისი უფლებამოსილებები სახელმწიფო აუდიტის სამსახურის მანდატს დაუქვემდებარა. საიამ მოამზადა დოკუმენტი, სადაც გაეცნობით საქართველოში ბოლო წლებში არსებული ანტიკორუფციული პოლიტიკის მიმოხილვას, ბოლო ცვლილებების მიზეზებისა და შესაძლო შედეგების კონტექსტში.

აღსანიშნავია, რომ ანტიკორუფციული ბიუროს მანდატი, მისი შექმნიდან დღემდე, მნიშვნელოვნად ასცდა დასახულ მიზანს და მისი მუშაობის მთავარი მიმართულება გახდა არა კორუფციის წინააღმდეგ ბრძოლა, არამედ სამოქალაქო საზოგადოების კონტროლი და შეზღუდვა. 2024-25 წლებში, ბოლოდროინდელი ძალადობრივი კანონმდებლობის მიღების შედეგად, საგრძნობლად გაიზარდა ანტიკორუფციული ბიუროს უფლებამოსილებები სამოქალაქო ორგანიზაციებისა და აქტივისტების კონტროლის მიმართულებით.

მიუხედავად იმისა, რომ ანტიკორუფციული ბიუროს საქმიანობა ისედაც არაეფექტიანი იყო, მისმა გაუქმებამ და უფლებამოსილებების აუდიტის სამსახურისთვის გადაცემამ პრობლემა შექმნა არა მხოლოდ ანტიკორუფციული ფუნქციების განხორციელების კუთხით, არამედ ასევე გამოიწვია აუდიტის სამსახურის ფუნქციური გადატვირთვა. აუდიტის სამსახური, როგორც სახელმწიფო ფინანსების მონიტორინგზე პასუხისმგებელი ორგანო, უნდა იყოს დამოუკიდებელი და ზედმეტი, დამატებითი პასუხისმგებლობებისგან გათავისუფლებული." — წერია საიას მიერ გამოქვეყნებულ შეფასებაში.