აშშ-ის პრეზიდენტმა დონალდ ტრამპმა განაცხადა, რომ რუსეთის პრეზიდენტ ვლადიმერ პუტინთან სატელეფონო საუბრისას უკრაინაში მიმდინარე ოთხწლიან ომში შესაძლო ცეცხლის შეწყვეტის საკითხი განიხილა. ინფორმაციას Reuters ავრცელებს.

მისი განცხადება მოჰყვა კრემლის ინფორმაციას იმის შესახებ, რომ ლიდერებმა მომავალ თვეში მეორე მსოფლიო ომის დასრულების წლისთავთან დაკავშირებით უკრაინაში დროებითი ზავის საკითხზე იმსჯელეს.

"კარგი საუბარი გვქონდა, მას დიდი ხანია ვიცნობ", — განაცხადა ტრამპმა.

ოვალურ კაბინეტში Artemis II-ის მისიის ასტრონავტებთან შეხვედრისას, ტრამპმა ჟურნალისტებს განუცხადა, რომ რუსეთის ლიდერთან საუბრისას მან უკრაინაში "ცეცხლის შეწყვეტის მცირე მცდელობა" შესთავაზა.

"ვფიქრობ, ის შესაძლოა ასეც მოიქცეს", — თქვა ტრამპმა, შემდეგ კი რეპორტიორებს ჰკითხა, ხომ არ გამოუცხადებია პუტინს უკრაინაში ცეცხლის შეწყვეტა უკვე.

გასულ წელს პუტინმა მსგავსი ზავი გამოაცხადა, რომელიც სამ დღეს გაგრძელდა, თუმცა ის კიევთან შეთანხმებული არ ყოფილა.

Reuters წერს, რომ ლიდერებს შორის ბოლო საჯაროდ ცნობილი სატელეფონო საუბარი 9 მარტს შედგა, თუმცა ტრამპმა მიანიშნა, რომ ისინი რეგულარულად საუბრობენ.

ტრამპის თქმით, პუტინმა მას დახმარება შესთავაზა ირანის გამდიდრებული ურანის საკითხთან დაკავშირებით, რაც ირანის ომის დასრულების გზაზე მთავარი დაბრკოლებაა, თუმცა ტრამპმა უპასუხა:

"მე ვუთხარი, რომ ბევრად მირჩევნია თქვენ ჩართული იყოთ უკრაინასთან ომის დასრულებაში. სანამ დამეხმარებით, მსურს თქვენი ომი დასრულდეს", — განაცხადა ტრამპმა.

რუსეთის პრეზიდენტის თანაშემწე იური უშაკოვს არ დაუკონკრეტებია, თუ რა წინადადებები წამოაყენა პუტინმა ირანთან დაკავშირებით.

უშაკოვმა ჟურნალისტებს განუცხადა, რომ პუტინმა უკრაინაში დროებითი ზავის ინიციატივა 9 მაისის დღესასწაულისთვის წამოაყენა, რომელიც მეორე მსოფლიო ომში ნაცისტური გერმანიის დამარცხებაში საბჭოთა კავშირის როლის აღსანიშნავად იმართება. მისი თქმით, ტრამპს პოზიტიური რეაქცია ჰქონდა.

უშაკოვმა ასევე დასძინა, რომ მეგობრული და საქმიანი საუბრისას, რომელიც საათნახევარზე მეტხანს გაგრძელდა, ტრამპმა გამოთქვა იმედი, რომ უკრაინის ომის დასასრულებლად შეთანხმება ახლოსაა.