ევროკომისიის პრეზიდენტმა ურსულა ფონ დერ ლაიენმა ევროპარლამენტში განაცხადა, რომ ახლო აღმოსავლეთში მიმდინარე დაძაბულობის გამო ევროპა ყოველდღიურად ნახევარ მილიარდ ევროს კარგავს, რაც გამოწვეულია წიაღისეულ საწვავზე ფასების მკვეთრი ზრდით — ინფორმაციას POLITICO ავრცელებს.

ფონ დერ ლაიენის თქმით, კონფლიქტის ბოლო 60 დღის განმავლობაში ევროპის იმპორტის ხარჯები 27 მილიარდი ევროთი გაიზარდა, თუმცა რეალურად ევროკავშირს დამატებითი ენერგია არ მიუღია. კრიზისს კიდევ უფრო ამწვავებს აშშ-ის პრეზიდენტის, დონალდ ტრამპის შესაძლო გეგმა ირანის ხანგრძლივი ბლოკადისა და ჰორმუზის სრუტისთვის საფრთხის შექმნის შესახებ, რომელიც გლობალური ნავთობვაჭრობისთვის კრიტიკული წერტილია.

"გამოსავალი აშკარაა. ჩვენ უნდა შევამციროთ გადამეტებული დამოკიდებულება იმპორტირებულ წიაღისეულ საწვავზე და ხელი შევუწყოთ ჩვენს ადგილობრივ, ხელმისაწვდომ და სუფთა ენერგიის მიწოდებას — განახლებადი ენერგიიდან ბირთვულამდე, ტექნოლოგიური ნეიტრალიტეტის სრული დაცვით," — განაცხადა ფონ დერ ლაიენმა სტრასბურგში, ევროპარლამენტის წინაშე გამოსვლისას.

ამას გარდა, ევროკომისიის პრეზიდენტის განცხადებით, კომისია ზაფხულისთვის, წარმოადგენს "ელექტრიფიკაციის სამოქმედო გეგმას", რომელიც ამბიციურ მიზნებს მოიცავს ევროკავშირის მასშტაბით.