ოქსფორდის უნივერსიტეტის ბიბლიოთეკის ფუმფულა ბინადარი სტუდენტებს სტრესულ დღეებში კომპანიონობას უწევს.

ჯეიმი ფიშვიკ-ფორდი ოქსფორდის უნივერსიტეტის ერთ-ერთი კოლეჯის, ლედი მარგარეტ ჰოლის, ბიბლიოთეკარია. როცა ჯეიმიმ თავისი ფისო, იზამბარდ კიტენ ბრუნელი (იგივე, იზი) აიყვანა, მან მალევე დაიწყო იზის სამსახურში წაყვანა.

ფოტო: SWNS

მიუხედავად იმისა, რომ იზი დროის უმეტეს ნაწილს ჯეიმის კაბინეტში ატარებს, მან მალე მოიპოვა პოპულარობა უნივერსიტეტში. 43 წლის ჯეიმი ფისოს ხანდახან გარეთ უშვებს, რათა სტუდენტები მოეფერონ ან ცოტა "ივარჯიშოს" და ხეებზე იძრომიალოს.

როცა იზი კამპუსში პირველად გამოჩნდა, ლედი მარგარეტ ჰოლი ძაღლების მოყვარული კოლეჯი იყო.

"ჩვენს გერბზე ორი ძაღლია გამოსახული, რადგან კოლეჯი ეპისკოპოსმა ტალბოტმა დააარსა, 'ტალბოტი' კი შუა საუკუნეების სანადირო ძაღლის ჯიშია" — ამბობს ფიშვიკ-ფორდი — "კოლეჯის დირექტორს, ალან რასბრიჯერს, ორი ძაღლი ჰყავდა, პერსონალის ნაწილსაც დაჰყავდა ძაღლები კოლეჯში. არსებობდა წესი, რომელიც სამსახურში ძაღლის მოყვანის ნებას გრთავდა, თუ ის ძირითადად შენს კაბინეტში იქნებოდა. მე კატები მირჩევნია, ამიტომ გადავწყვიტე, ძაღლის ნაცვლად კატა მომეყვანა".

როგორც ჯეიმი ამბობს, იზი ნამდვილი ნუგეში გახდა იმ სტუდენტებისთვის, რომლებსაც სწავლის პერიოდში საკუთარი შინაური ცხოველებისაგან შორს ყოფნა უწევთ და ისინი ენატრებათ. ფიშვიკ-ფორდის თქმით, ფისო ძალიან ემპათიურია და არაოფიციალურად თერაპევტი ცხოველის როლსაც კი ასრულებს.

"სახლიდან და იმ ცხოველებისგან შორს ყოფნა, რომლებთან ერთადაც მთელი ცხოვრება გაატარე, ძალიან რთულია. თანაც, მშობლებთან დარეკვა, როცა მოგენატრებიან, ბევრად უფრო მარტივია, ვიდრე კატებთან, — თქვა მან.

ჯეიმის თქმით, იზი ყოველთვის მეგობრული და მშვიდია, თუმცა, როცა ვინმე მოწყენილია ან ტირის, კიდევ უფრო მეტი სითბოთი გამოირჩევა.

ფოტო: SWNS

აღსანიშნავია, რომ იზი კამპუსს გარეთაც არანაკლებ პოპულარობით სარგებლობს. ავტობუსში ის სხვა მგზავრებისგან ყურადღებას ელოდება და მანამ კნავის, სანამ თავისას არ მიაღწევს.

"ბევრ კოლეჯს ჰყავს ცხოველები, მაგრამ ბიბლიოთეკის კატა — არავის. იზის უკვე აქვს იმ კოლეჯების გრძელი სია, რომლებსაც მომავალ სემესტრში უნდა ესტუმროს, ასე რომ მისი განრიგი ამჟამად ძალიან გადატვირთულია".