პარტია ქართული ოცნება — დემოკრატიული საქართველოს დაარსებიდან 14 წლის იუბილესთან დაკავშირებით, ირაკლი კობახიძემ, სოციალურ ქსელში განცხადება გაავრცელა, სადაც ქვეყნის განვითარების გზა და მიღწევები შეაჯამა.

კობახიძის თქმით, 2012 წლის 21 აპრილი გარდამტეხი თარიღი გახდა საქართველოს უახლეს ისტორიაში, რომელმაც ქვეყნის დემოკრატიული ტრანსფორმაციის საფუძველი შექმნა.

"14 წლის წინ, დღევანდელ დღეს, საქართველოს უახლეს ისტორიაში გარდამტეხი მოვლენა მოხდა, დაფუძნდა პოლიტიკური გაერთიანება — „ქართული ოცნება — დემოკრატიული საქართველო“. 2012 წლის 21 აპრილი, რომელსაც, ლოგიკურად 2012 წლის პირველ ოქტომბერს, „ნაციონალური მოძრაობის“ რეჟიმის დამარცხება მოჰყვა, სიმბოლურად, იმ წერტილად იქცა, საიდანაც ავტოკრატიული მმართველობის მოდელის მქონე, გარე ინტერესებს დაქვემდებარებული ქვეყნიდან, თანამედროვე, დემოკრატიულ, ღირსეულ სახელმწიფოდ ჩამოვყალიბდით.

ჩვენმა პოლიტიკურმა გუნდმა, ნაბიჯ-ნაბიჯ, სუვერენული, სტაბილური, განვითარებული სახელმწიფოს მშენებლობისკენ დაიწყო სვლა და დღეს უკვე ყველასთვის ნათელია, რომ წარსულს სამუდამოდ ჩავაბარეთ ის უმძიმესი მემკვიდრეობა, რომელიც ნაციონალური მოძრაობის რეჟიმმა შექმნა," — ნათქვამია განცხადებაში.

მისივე შეფასებით, 2012 წლამდე ქვეყანაში მძიმე სისტემური პრობლემები არსებობდა.

"ჩვენმა პოლიტიკურმა გუნდმა ჩაიბარა ქვეყანა, სადაც სასამართლოს ნულოვანი ნდობა ჰქონდა, მედია ერთი პარტიის ინტერესებს ექვემდებარებოდა, ხოლო ძალოვანი სტრუქტურები მოქალაქეების წინააღმდეგ მიმართულ იარაღად იყვნენ ქცეული," — აღნიშნა მან.

კობახიძის განცხადებით, ბოლო 14 წლის განმავლობაში ქვეყანამ მნიშვნელოვანი პროგრესი განიცადა:

"დღეს საქართველო უკვე სრულიად განსხვავებულ რეალობაში ცხოვრობს, ქვეყანაში, სადაც ეტაპობრივად განმტკიცდა სამართლებრივი სახელმწიფო და მნიშვნელოვნად გაიზარდა საზოგადოების ნდობა ინსტიტუტების მიმართ. მართლმსაჯულების სისტემა გახდა გამჭვირვალე და დამოუკიდებელი, ხოლო სასამართლო კანონის უზენაესობაზე და ადამიანის უფლებების დაცვაზე ორიენტირებული. ხაზგასმით აღსანიშნავია, რომ ადამიანის უფლებები და თავისუფლებების დაცვა ფორმალობიდან — რეალობად იქცა, რადგან სახელმწიფოს პოლიტიკა თითოეული მოქალაქის ღირსების ხელშეუვალობასა და უსაფრთხოების უზრუნველყოფაზეა ორიენტირებული," — განაცხადა მან.

მან აქვე გაუსვა მედიაგარემოს მრავალფეროვნებასაც.

"მედიაგარემო მრავალფეროვანი და პლურალისტური გახდა — დღეს ქვეყანაში თავისუფლად ფუნქციონირებს განსხვავებული სარედაქციო პოლიტიკის მქონე არაერთი ტელევიზია, ონლაინ და ბეჭდური საშუალება, რაც უზრუნველყოფს ინფორმაციის ხელმისაწვდომობას და კრიტიკული აზრის თავისუფალ გამოხატვას," — აღნიშნა კობახიძემ.

აღსანიშნავია, რომ განცხადებაში განსაკუთრებული ყურადღება ეთმობა პარტიის დამფუძნებლის როლსაც:

"რასაკვირველია, ამ ისტორიულ პროცესში განსაკუთრებულად უნდა აღინიშნოს ბიძინა ივანიშვილის ფუნდამენტური როლი, რომელიც დღეს უკვე ქართული ოცნება — დემოკრატიული საქართველოს საპატიო თავმჯდომარემ თანამედროვე ქართული სახელმწიფოს ფორმირებაში შეიტანა. სწორედ მისმა ხედვამ და ქვეყნისა და ხალხის წინაშე აღებულმა პირადმა პასუხისმგებლობამ განსაზღვრა გზა, რომელმაც საქართველო გარდამტეხ ეტაპამდე მიიყვანა, სწორედ მისი ლიდერობით გახდა შესაძლებელი საზოგადოების გაერთიანება საერთო ეროვნული მიზნის გარშემო, დემოკრატიული ცვლილებების მშვიდობიანი გზით განხორციელება და იმ სისტემური მანკიერებების დემონტაჟი, რომლებიც წლების განმავლობაში აფერხებდა ქვეყნის განვითარებას," — განაცხადა კობახიძემ.

დასასრულს, კობახიძემ პარტიის წევრებსა და მხარდამჭერებს იუბილე მიულოცა და აღნიშნა, რომ ქვეყანას წინ კიდევ დიდი მიზნები და შესაძლებლობები აქვს.