რუსეთში, დაღესტნის რესპუბლიკაში ძლიერი ნალექით გამოწვეულ წყალდიდობას, ბოლო მონაცემებით, სამი ადამიანი ემსხვერპლა, მათ შორის ერთი არასრულწლოვანი და ორსული ქალი. ინფორმაციას რუსული მედია ავრცელებს.

დაღესტნის დერბენტის რაიონში ვითარება კრიტიკულია. გადაუღებელი წვიმების შედეგად, გეჯუხის წყალსაცავში წყლის დონემ კრიტიკულ ზღვარს გადააჭარბა, რამაც კაშხლის ლოკალური გარღვევები გამოიწვია.

სტიქიის ზონაში მოყოლილი ოთხი მიკრორაიონიდან 4 000-ზე მეტი ადამიანის სასწრაფოდ გამოიყვანეს. სულ მცირე ცხრა დასახლებაში 2 000-ზე მეტი საცხოვრებელი სახლია დატბორილი. სპეციალისტები მოსახლეობას აფრთხილებენ, რომ მეწყრის, კლდეების ჩამოშლისა და ღვარცოფის საფრთხე კვლავ მაღალია.

პარალელურად, მძიმე ვითარებაა რესპუბლიკის დედაქალაქ მაჰაჩყალაშიც. ნიადაგის ეროზიისა და დატბორვის გამო, მრავალსართულიანი საცხოვრებელი კორპუსის ნაწილი ჩამოინგრა.

ამ ინცინდენტს მსხვერპლი არ მოჰყოლია, თუმცა საფრთხე არ განეიტრალებულა — ქალაქის ადმინისტრაცია იტყობინება, რომ კიდევ ოთხ მრავალსართულიან კორპუსს ჩამონგრევის რეალური საფრთხე ემუქრება. ამ უბნებიდან დამატებით 300-მდე ადამიანია ევაკუირებული, ტერიტორია კი სამართალდამცავების მიერ არის ბლოკირებული.