2025 წლის ოქტომბერში პარიზის ლუვრის მუზეუმი გაქურდეს. 8 ძვირფას ნივთთან ერთად მძარცველებს იმპერატრიცა ეუჟენის, ნაპოლეონ III-ის მეუღლის, გვირგვინის მოპარვაც სურდათ, თუმცა ეს სურვილი წარუმატებლად დასრულდა.

გვირგვინი ერთადერთი ნივთი იყო, რომელიც, მოპარვის მცდელობის მიუხედავად, მძარცველებმა ადგილზე დატოვეს — ოქროთი, ზურმუხტებითა და ბრილიანტებით მორთული ძვირფასეულობა მათ მუზეუმის გარეთ, საფეხმავლო ბილიკზე დაუვარდათ.

ლუვრის მიერ გამოქვეყნებულ ფოტოებში ჩანს, თუ როგორ დაზიანდა გვირგვინი:

ძარცვამდე

ძარცვამდე

ფოტო: AFP

ძარცვის შემდეგ

ძარცვის შემდეგ

ფოტო: Thomas Clot, AFP

მუზეუმის ადმინისტრაციამ განაცხადა, რომ უახლოეს მომავალში გვირგვინის აღსადგენად კონკურსი გამოცხადდება, პროცესს კი ექსპერტთა ჯგუფი დააკვირდება. აღდგენის ზუსტი ღირებულება ჯერ უცნობია, თუმცა, წინასწარი შეფასებით, დაახლოებით €40 000 დაჯდება. გვირგვინის თითქმის ყველა დეტალი ნაპოვნია, ამიტომ ძირითადი ხარჯი არა მასალებზე, არამედ ხანგრძლივ სამუშაოებზე გადანაწილდება.

ძარცვაში მონაწილეობისთვის პოლიციამ უკვე 5 ადამიანი დააკავა, თუმცა, გარდა იმპერატრიცას გვირგვინისა, ლუვრმა ჯერჯერობით ვერცერთი დაკარგული ნივთი ვერ დაიბრუნა.

ეუჟენის გვირგვინი ერთ-ერთია იმ იშვიათ გვირგვინთა შორის, რომელიც საფრანგეთს დღემდე აქვს შემონახული. მათი დიდი ნაწილი ქვეყანამ რევოლუციის დროს დაკარგა, დანარჩენი კი — მე-19 საუკუნის ბოლოს.

იმპერატრიცას გვირგვინი 1988 წლიდან ლუვრის მუზეუმში ინახება. ის ნაპოლეონ III-ის — საფრანგეთის უკანასკნელი იმპერატორის — მიერ დაკვეთილი გვირგვინების წყვილში შედიოდა და 1 354 ბრილიანტით, 1 136 ალმასითა და 56 ზურმუხტითაა მორთული.

მას შემდეგ, რაც ნაპოლეონ III პრუსიაში ტყვედ ჩავარდა და საფრანგეთზე კონტროლი დაკარგა, იმპერატრიცა ინგლისში გაიქცა, თუმცა გვირგვინი, რომელიც საფრანგეთში დარჩა, მოგვიანებით დაიბრუნა. ეუჟენმა ის საბოლოოდ თავის ნათლულს, პრინცესა მარი-კლოტილდ ნაპოლეონს უანდერძა.

ლუვრის განცხადების თანახმად, გვირგვინის 1 354 ბრილიანტიდან დაახლოებით 10 დაკარგულია, ისევე, როგორც ერთ-ერთი ოქროს არწივი. თანამშრომლები ვარაუდობენ, რომ იმპერატრიცას სიმბოლო წლის ბოლომდე აღდგება.