საქართველოს მთავრობამ ქართული ოცნების ქარელის მაჟორიტარი დეპუტატის, ლერი ხაბელოვის დის, ინგა ხაბელოვას კომპანიას, შპს სამკურნალო-სპორტულ გამაჯანსაღებელ კომპლექს ოლიმპს, ბორჯომში, რუსთაველის N101-ში მდებარე არასასოფლო-სამეურნეო დანიშნულების 2 301 კვადრატული მეტრი მიწის ნაკვეთი და 1 801 კვადრატული შენობა-ნაგებობა პირდაპირი მიყიდვის წესით 50 000 ლარად გადასცა.

პრემიერმინისტრ გიორგი კვირიკაშვილის მიერ 2016 წლის 14 ივნისის განკარგულებაში წერია, რომ ოლიმპს ეკისრება ვალდებულება, აღნიშნულ ტერიტორიაზე მოაწყოს მინიმუმ 40 ადამიანზე გათვლილი საცურაო აუზი 12 საშხაპე კაბინითა და 2 გასახდელით. ოლიმპს დაეკისრა ვალდებულება, აღნიშნულ ტერიტორიაზე განახორციელოს 1 050 000 ლარის ინვესტიცია.

ჩემს დას ცალკე ოჯახი აქვს, მე - ცალკე

ლერი ხაბელოვი

შპს სამკურნალო-სპორტულ გამაჯანსაღებელი კომპლექსი ოლიმპი 2013 წლის გაზაფხულამდე ქართული ოცნების დეპუტატის, ლერი ხაბელოვის საკუთრებაში იყო. 2013 წლის 13 აპრილს მან აღნიშნული კომპანია თავის დას, ინგა ხაბელოვას მიჰყიდა 320 370 ლარად.

ლერი ხაბელოვმა On.ge-სთან ინტერვიუში განაცხადა, რომ მას ოლიმპთან ამჟამად არანაირი კავშირი არ აქვს და ის მთლიანად მისი დის ბიზნესია:

„ამას თავისი ვალდებულებები მოჰყვა. რამდენადაც ვიცი, მილიონი ლარის ინვესტიციის ვალდებულება აქვს. ეგ არის დანგრეული შენობა და აუზის აღდგენაზეა საუბარი, რომელიც უნდა მოემსახუროს სპორტსა და ადგილობრივ მუნიციპალიტეტს. სუფთა ბიზნესის საკითხია, ცოტა სარისკოდაც მეჩვენებოდა, ვეუბნებოდი, მაგრამ თვითონ უნდა და აკეთებს. ჩემს დას ცალკე ოჯახი აქვს, მე ცალკე“.

ლერი ხაბელოვი 2012 წელს ქართული ოცნების მაჟორიტარი დეპუტატი გახდა ქარელიდან. ამჟამად ის არის სპორტისა და ახალგაზრდულ საქმეთა კომიტეტის თავმჯდომარე, ასევე, საქართველოს ეროვნული ოლიმპიური კომიტეტის პრეზიდენტი.