უკრაინის პრეზიდენტმა, ვოლოდიმირ ზელენსკიმ განაცხადა, რომ ამერიკის შეერთებული შტატები კიევს უსაფრთხოების გარანტიებს დონბასის (დონეცკისა და ლუგანსკის ოლქების) არაოკუპირებული ნაწილებიდან უკრაინული ჯარების გაყვანის სანაცვლოდ სთავაზობს. ამის შესსახებ უკრაინის პრეზიდენტმა Reuters-ისთვის მიცემულ ინტერვიუში ისაუბრა. ინფორმაციას Ukrainefrom ავრცელებს.

"ამერიკელები მზად არიან, ეს გარანტიების შესახებ მოლაპარაკებები მაღალ დონეზე დაასრულონ, როგორც კი უკრაინა მზად იქნება დონბასიდან ჯარების გასაყვანად", — განაცხადა ზელენსკიმ.

მისი თქმით, რადგან შეერთებული შტატები ამჟამად ირანთან კონფლიქტზეა ფოკუსირებული, პრეზიდენტი დონალდ ტრამპი უკრაინაზე ზეწოლას ახდენს, რათა რუსეთ-უკრაინის ომი სწრაფად დასრულდეს.

"ახლო აღმოსავლეთს ნამდვილად აქვს გავლენა პრეზიდენტ ტრამპზე და, ვფიქრობ, მის შემდგომ ნაბიჯებზეც. პრეზიდენტი ტრამპი, სამწუხაროდ, ჩემი აზრით, კვლავ ირჩევს უკრაინულ მხარეზე მეტი ზეწოლის სტრატეგიას", — აღნიშნა ზელენსკიმ.

უკრაინის პრეზიდენტმა არაერთხელ გაუსვა ხაზი საერთაშორისო პარტნიორებისგან საიმედო უსაფრთხოების გარანტიების საჭიროებას, რათა თავიდან აიცილონ რუსეთის მიერ საომარი მოქმედებების მომავალში, სამშვიდობო შეთანხმების მიღწევის შემთხვევაში, განახლება.

ზელენსკიმ აღნიშნა, რომ იანვარში უკრაინასა და აშშ-ს შორის უსაფრთხოების გარანტიების შესახებ დოკუმენტი "100%-ით მზად" იყო და ხელმოწერას ელოდა. თუმცა, მაიამიში ამერიკელ და უკრაინელ ოფიციალურ პირებს შორის გამართული მოლაპარაკებების შემდეგ, მან თქვა, რომ სამუშაო ჯერ კიდევ შესასრულებელია.

მან ასევე განაცხადა, რომ რუსეთი, რომელიც მუდმივად ითხოვს დონბასის იმ ტერიტორიებს, რომლებიც კვლავ უკრაინის კონტროლის ქვეშაა, იმედოვნებს, რომ ვაშინგტონი მოლაპარაკებებისადმი ინტერესს დაკარგავს და პროცესიდან გავა.