სამების საკათედრო ტაძრის მღვდელმსახურის, არქიმანდრიტ იოვანე მჭედლიშვილის განცხადებით, კათალიკოს-პატრიარქის, ილია II-ის დაკრძალვის კვირის მსახურება 09:00 საათზე დაიწყება. სამების საკათედრო ტაძარში მსოფლიო პატრიარქს, ბართლომე I-ს 12 საათისთვის ელოდებიან — ის მღვდელმთავრებთან ერთად პატრიარქს წესს აუგებს.

არქიმანდრიტის განცახდებით, სამების საკათედრო ტაძრიდან გადასვენების პროცესი, სავარაუდოდ, 15:00 საათიდან დაიწყება.

"კვირის მსახურება დაიწყება 09:00 საათზე. მეუფე შიო, მღვდელმთავრებთან ერთად, აღავლენს წირვას. მსოფლიოს პატრიარქის თვითმფრინავი, დაახლოებით, 11:00 საათზე დაფრინდება თბილისის აეროპორტში და 12:00 საათისთვის ველოდებით აქ. ეს არის მისი გადაწყვეტილება და წესის აგებაში მიიღებს მონაწილეობას. ის აუგებს წესს მღვდელმთავრებთან ერთად.

შემდეგ იქნება სიტყვით გამოსვლა, ქადაგება სხვადასხვა მოღვაწეებისა, უწმინდესის შესახებ. უკვე შემდეგ სიონში გადავასვენებთ უწმინდესს და იქ დაიკრძალება. ოფიციალურად სტუმრების სიას გამოაქვეყნებს საპატრიარქოს გვერდი.

რაც შეეხება გადასვენებას, ზუსტად ვერ გეტყვით, რომელზე იქნება გადასვენება, რა დროს მობრძანდება მსოფლიო პატრიარქი, რამდენ ხანს გაგრძელდება წესის აგება, სიტყვით გამოსვლა, გამოსვენება, დაახლოებით 15:00 საათიდან 16:00 საათამდე, სავარაუდოდ," — განაცხადა არქიმანდრიტმა ჟურნალისტებთან საუბრისას.

არქიმანდრიტმა ჟურნალისტებს ასევე განუცხადა, რომ პატრიარქის დაკრძავის დღეს სამების საკათედრო ტაძარში მხოლოდ საშვით იქნება შესვლა შესაძლებელი.

"ხედავთ რა ხდება, მეტროდან იწყება მოქალაქეების რიგები, უწყვეტად მრავალი საათის განმავლობაში და მით უმეტეს დაკრძალვის დღეს ბევრად მეტი ადამიანი იქნება. ალბათ, გადაჭედილი იქნება მთელი ტერიტორია, სამებიდან სიონის ტაძრამდე. მხოლოდ საშვებით იქნება დაშვება. სასულიერო პირებიც შეზღუდულად იმსახურებენ წირვის დროს და შესვლა იქნება მხოლოდ საშვებით. ეზოში მოქალაქეები, დიდი ალბათობით, ჩვეულებრივად იქნებიან," — განაცხადა არქიმანდრიტმა იოვანე მჭედლიშვილმა.

შეგახსენებთ, პატრიარქის დაკრძალვა კვირას, 22 მარტს გაიმართება. ილია II-ის სურვილის თანახმად, მას თბილისის სიონის საკატედრო ტაძარში დაკრძალავენ. ილია II-ის გარდაცვალებასთან დაკავშირებით გამოცხადებული ეროვნული გლოვა 22 მარტამდე გაგრძელდება.

რუსული სააგენტო "სპუტნიკის" ცნობით, სრულიად საქართველოს პატრიარქ ილია II-ის დაკრძალვაზე, მოსკოვისა და სრულიად რუსეთის პატრიარქ კირილის სახელით, რუსეთის მართლმადიდებლურ ეკლესიას სრულიად ბელორუსის საპატრიარქო ეგზარქოსი მიტროპოლიტი ბენიამინი (ტუპეკო), წარმოადგენს.