რუსული სააგენტო "სპუტნიკის" ცნობით, სრულიად საქართველოს პატრიარქ ილია II-ის დაკრძალვაზე, მოსკოვისა და სრულიად რუსეთის პატრიარქ კირილის სახელით, რუსეთის მართლმადიდებლურ ეკლესიას სრულიად ბელორუსის საპატრიარქო ეგზარქოსი მიტროპოლიტი ბენიამინი (ტუპეკო), წარმოადგენს. პატრიარქის დაკრძალვაზე ბელორუსი ეგზარქოსის ჩამოსვლა "პუბლიკას" საპატრიარქოს საზოგადოებასთან ურთიერთობის სამსახურში დაუდასტურეს.

მათვე ცნობით, მიტროპოლიტმა ბენიამინმა, სამძიმარი გამოთქვა ილია II-ის გარდაცვალების გამო.

"ბელორუსის მართლმადიდებელმა მორწმუნეებმა ღრმა მწუხარებით მიიღეს სრულიად საქართველოს კათოლიკოს-პატრიარქ ილია II-ის მიწიერი ცხოვრების დასრულების ამბავი. ქრისტეს ვენახის ერთგული მუშაკი, რომლის სახელიც სამუდამოდ არის ჩაწერილი საქართველოს სახელმწიფოსა და ხალხის ისტორიაში, უფალს მიადგა", — ნათქვამია ბელორუსის მართლმადიდებლური ეკლესიის მეთაურის წერილში.

მიტროპოლიტმა ვენიამინმა აღნიშნა, რომ ილია II მართლმადიდებლურ სამყაროში დიდი პატივისცემითა და ავტორიტეტით სარგებლობდა და გაიხსენა მისი ვიზიტი ბელარუსში 2013 წელს, რუსეთის ნათლობის 1025 წლის იუბილეს აღსანიშნავად.

"სრულიად საქართველოს კათოლიკოს-პატრიარქის ილია II-ის სულიერი ღვაწლი ქრისტეს ცოცხალ ქადაგებად იქცა არა მხოლოდ ქართველი ხალხის საკეთილდღეოდ, არამედ ეკლესიებს შორის ძმური კავშირების შესანარჩუნებლადაც, რაც გვახსენებს, რომ ჩვენ ვართ ქრისტეს ერთი სხეული, გაერთიანებული ერთი რწმენითა და სიყვარულით", — ნათქვამია მიმართვაში.

პატრიარქის დაკრძალვა კვირას, 22 მარტს გაიმართება. ილია II-ის სურვილის თანახმად, იგი დაკრძალულია თბილისის სიონის ტაძარში. ილია II-ის გარდაცვალებასთან დაკავშირებით გამოცხადებული ეროვნული გლოვა 22 მარტამდე გაგრძელდება. წმინდა სინოდის გადაწყვეტილებით, სენაკისა და ჩხოროწყუის მიტროპოლიტი შიო (მუჯირი) ოფიციალურად გახდა საპატრიარქო ტახტის მოსაყდრე ახალი კათოლიკოს-პატრიარქის არჩევნებამდე.