აკადემიის რიგით 98-ე დაჯილდოების ცერემონიას ABC-სა და Hulu-ზე 17.86 მილიონმა ადამიანმა უყურა, რაც 2022 წლის შემდეგ ოსკარის ყველაზე დაბალი მაჩვენებელია. გასულ წელთან შედარებით, როდესაც მაყურებელთა რაოდენობამ ბოლო ხუთი წლის პიკს, 19.7 მილიონს მიაღწია, წლევანდელი მონაცემები 9%-ით არის შემცირებული.

18-დან 49 წლამდე ასაკის ზრდასრულებში გადაცემის რეიტინგმა საშუალოდ 3.92 შეადგინა (გასულ წელს ეს მაჩვენებელი 4.54 იყო, ხოლო 2024 წელს — 3.82). მიუხედავად წლევანდელი კლებისა, Disney-ს ინფორმაციით, 98-ე დაჯილდოება მაინც იკავებს პირველ ადგილს 2025-2026 წლების სეზონის პრაიმ-ტაიმის გასართობ გადაცემებს შორის.

კვირა საღამოს ტრანსლაციის მაჩვენებლების ვარდნა, რომლის წამყვანიც კონან ო’ბრაიენი იყო, ემთხვევა ამ ზამთარს სხვა პრესტიჟული დაჯილდოებების ტენდენციას: იანვარში ოქროს გლობუსის აუდიტორია 6%-ით შემცირდა (8.66 მლნ მაყურებელი), ხოლო თებერვალში გრემის მაყურებელთა რაოდენობამ ასევე 6%-ით იკლო (14.4 მლნ მაყურებელი).

ყველა მონაცემი ეყრდნობა Nielsen-ის კვლევას. ოსკარი კვირის რეიტინგებში უპირობო ლიდერი იყო როგორც მაყურებელთა საერთო რაოდენობით, ისე ყველა საკვანძო დემოგრაფიულ ჯგუფში.

ABC-ის ცნობით, წელს სოციალურ ქსელებში ჩართულობა 42.4%-ით გაიზარდა (184,314,370), ხოლო აკადემიის პლატფორმების გამომწერთა აქტივობამ 21.6 მილიონს მიაღწია (გასული წლის 19.7 მილიონთან შედარებით), რაც მთელი ღამის განმავლობაში ვიდეოების 129 მილიონზე მეტ ნახვას მოიცავს.

ეს ბოლო ხუთი წლის განმავლობაში ცერემონიის რეიტინგის ვარდნის პირველი შემთხვევაა. 2021 წელს, პანდემიის დაწყების შემდეგ გამართულ პირველ დაჯილდოებაზე, მაყურებელთა რაოდენობა ისტორიულ მინიმუმამდე, 10.4 მილიონამდე დაეცა, თუმცა მას შემდეგ ჰოლივუდის ყველაზე მნიშვნელოვანი ღონისძიების აუდიტორია ზედიზედ სამი წელი იზრდებოდა: 16.6 მლნ (2022 წელს), 18.8 მლნ (2023 წელს), 19.5 მლნ (2024 წელს) და 19.7 მლნ (2025 წელს).

ო’ბრაიენმა, რომელიც ზედიზედ მეორედ უძღვებოდა საღამოს, კვლავ მაღალი შეფასებები დაიმსახურა. Walt Disney Television-ის აღმასრულებელმა ვიცე-პრეზიდენტმა, რობ მილსმა, ორშაბათს დილით Variety-სთან საუბრისას აღნიშნა, რომ ეს პოზიცია კვლავ კონანისაა, თუკი თავად კომიკოსს, პოდკასტერსა და ღამის შოუების ყოფილ წამყვანს ამის სურვილი ექნება.

Disney-სა და ოსკარს შორის გაფორმებულ კონტრაქტს კიდევ ორი წელი აშორებს დასრულებამდე. ცერემონია ABC-სა და Hulu-ზე 2027 და 2028 წლებშიც გადაიცემა, ხოლო 2029 წლიდან, რიგით 101-ე დაჯილდოებიდან, ძალაში შევა აკადემიის ახალი შეთანხმება YouTube-თან (რომელიც ტრანსლაციის უფლებებს მინიმუმ 2033 წლამდე ფლობს).

ასევე ნახეთ: