ევროპარლამენტის სამოქალაქო თავისუფლებათა, მართლმსაჯულებისა და შინაგან საქმეთა კომიტეტში (LIBE), საქართველოს სავიზო ლიბერალიზაციის საკითხის განხილვა 27 ივნისს ჩაინიშნა. ამის შესახებ ევროპარლამენტის დღის წესრიგში უკვე ჩაიწერა.

სხდომაზე განიხილავენ მომხსენებელ მარია გაბრიელის რეკომენდაციასა და წინადადებას ევროპარლამენტისა და საბჭოსთვის, რომ საქართველოსათვის დაწესდეს შენგენის ზონაში უვიზო რეჟიმი.

20 ივნისს, ევროკავშირის საბჭომ საგარეო საქმეთა მინისტრების შემადგენლობით, ვიზალიბერალიზაცია ევროკავშირი-საქართველოს ურთიერთობების კონტექსტში განიხილა. სხდომას საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა ფედერიკა მოგერინი ხელმძღვანელობდა. მისი განცხადებით, ევროკავშირის წევრი ქვეყნების ყველა საგარეო საქმეთა მინისტრი შეთანხმდა, რომ საქართველომ ეჭვგარეშედ სრულად შეასრულა სავიზო ლიბერალიზაციის კრიტერიუმები.

მოგერინიმ, სხდომის შემდეგ, პრესკონფერენციაზე აღნიშნა, რომ ახლა საქართველოს სავიზო ლიბერალიზაციის საკითხი დამოკიდებულია ჰოლანდიაზე, როგორც ევროკავშირის საბჭოში თავმჯდომარე ქვეყანაზე, რათა ევროკავშირის ელჩების (Coreper) შეხვედრის უახლოეს დღის წესრიგში ჩასვან აღნიშნული საკითხი.

Coreper-ის შეხვედრა აქამდე სამჯერ გაიმართა, თუმცა კონკრეტული გადაწყვეტილება ვიზალიბერალიზაციაზე, ვერცერთხელ ვერ მიიღეს.

ფონდ ღია საზოგადოება საქართველოს წარმოამდგენლის ივანე ჩხიკვაძის განმარტებით, საქართველოსთვის სავიზო ლიბერალიზაციის მინიჭების საკითხს ევროპარლამენტმა საბჭოს სხდომის პარალელურად, ან ცოტა მოგვიანებით, კენჭს უნდა უყაროს. მისი თქმით, ივლისიდან ევროპარლამენტი შვებულების გამო მუშაობას სექტემბრამდე წყვეტს. სწორედ ამიტომ, საქართველოსთვის უვიზო მიმოსვლი შესახებ გადაწყვეტილების მიღებისთვის დარჩენილი პროცედურები შესაძლოა, გადაიდოს სექტემბრისთვის.

ევროპასთან უვიზო მიმოსვლამდე გასავლელი დარჩენილი პროცედურები

მოგერინი: ყველა შეთანხმდა, რომ საქართველომ ბრწყინვალედ შეასრულა ნაკისრი ვალდებულებები