პოლიტიკური სამართლის სპეციალისტი ვახუშტი მენაბდე გრანტების შესახებ კანონში ცვლილებებს ეხმაურება. მისი თქმით, "რეჟიმმა დიდი რესურსის და ძალის გამოყენების მიუხედავად, ვერ მიაღწია ლეგიტიმურობის აღიარებას და ასეთი რამ მოიფიქრა: "თუ არ მაღიარებთ, დაგიჭერთ". ის წერს, რომ "შეიძლება ძალა გქონდეს, მაგრამ ძალაუფლება არა — ესაა ლეგიტიმურობის ფორმირების საიდუმლო ინგრედიენტი, რასაც ავტორიტარული რეჟიმები არ ითვალისწინებენ".

"რეჟიმმა მიიღო კანონი, რომლითაც დაისჯები თუ ოცნება არალეგიტიმურად მიგაჩნია და ამაზე საჯაროდ და ხშირად ლაპარაკობ. მუხლს ჰქვია "ექსტრემიზმი".

ავტორიტარიზმმა ამუშავა პროპაგანდა, დაიჭირა ათეულობით ადამიანი შეთითხნილი ბრალდებებით, ასობით ადამიანი ადმინისტრაციული წესით დააპატიმრა, ტროტუარზე დგომის გამო გვაჯარიმებს, ფეისბუქ-პოსტის გამო "დმი"-ში გვიშვებს, გადაკეტა სამოქალაქო ორგანიზაციების დაფინანსების ყველა გზა, "ტიტუშკები" გამოუშვა ქალაქში, "რობოკოპების" შემდეგ.

ამხელა რესურსის და ძალის გამოყენების მიუხედავად, ვერ მიაღწია ლეგიტიმურობის აღიარებას და ასეთი რამ მოიფიქრა: "თუ არ მაღიარებთ, დაგიჭერთ".

ძალაუფლების წყარო ხალხია. შეიძლება (დროებით) ხალხს მოერიო, დაიჭირო, გააქციო, გააჩუმო კიდეც, მაგრამ აღიარება ვერ მიიღო. რა წამს მომენტი მოვა, მაშინვე მოგთხოვს მიტაცებული სახელმწიფოს უკან დაბრუნებას.

შეიძლება ძალა გქონდეს, მაგრამ ძალაუფლება არა — ესაა ლეგიტიმურობის ფორმირების საიდუმლო ინგრედიენტი, რასაც ავტორიტარული რეჟიმები არ ითვალისწინებენ", — წერს ვახუშტი მენაბდე სოციალურ ქსელში.

შეგახსენებთ, "გრანტების შესახებ კანონში ცვლილებების" მიხედვით, სისხლის სამართლის წესით დასჯადი ხდება საქართველოს კონსტიტუციური წყობილების ან კონსტიტუციური ორგანოების არაღიარება და 3 წლამდე პატიმრობით ისჯება, ამას გარდა დასჯადი ხდება გრანტების შესახებ კანონის დარღვევა და ბიზნესსუბიექტის პოლიტიკური აქტივობა.

ასევე სისხლის სამართლის კოდექსს დაემატა ახალი მუხლი — "ექსტრემიზმი კონსტიტუციური წყობილების წინააღმდეგ".

ამ მუხლის დარღვევა 3 წლამდე თავისუფლების აღკვეთას, ჯარიმას ან გამასწორებელ სამუშაოს ითვალისწინებს.

კანონს ხელი მიხეილ ყაველაშვილმა 4 მარტს მოაწერა, რის შემდეგ ის ძალაშია.