ანდრო ჭიჭინაძის მხარდამჭერი ბანერის ჩამოხსნის შემდეგ, მსახიობებმა — ნანკა კალატოზიშვილმა, კახა კინწურაშვილმა, ეკა დემეტრაძემ, გივიკო ბარათაშვილმა, ტასო ჭანტურაიამ და დავით ბეშიტაიშვილმა ვასო აბაშიძის ახალი თეატრი პროტესტის ნიშნად დატოვეს.

20 დეკემბერს, ვასო აბაშიძის ახალი თეატრის ფასადიდან მსახიობ ანდრო ჭიჭინაძის მხარდამჭერი ბანერი წარწერით "თავისუფლება სისტემის პატიმრებს" ჩამოხსნეს.

ბანერის ჩამოხსნა თავდაპირველად 19 თებერვალს სცადეს, რათა პროსამთავრობო ტელეკომპანიის რუსთავი 2-ის პროექტის ბანერი განეთავსებინათ და პრომო ვიდეო გადაეღოთ. წინააღმდეგობის მიუხედავად, მსახიობებმა ჩამოხსნილი ბანერი თეატრის აივანზე გადაკიდეს, მაგრამ ის შემდეგ დღეს საბოლოოდ ჩამოხსნეს.

ცნობისთვის, 2025 წლის 16 აპრილს ოცნების ხელისუფლების კულტურის სამინისტრომ დავით დოიაშვილი "ვასო აბაშიძის სახელობის მუსიკისა და დრამის თეატრის" ხელმძღვანელის თანამდებობიდან გაათავისუფლა.

მსახიობი ანდრო ჭიჭინაძე 2024 წლის 5 დეკემბერს დააკავეს. პროკურატურის მტკიცებით, 2024 წლის 29 ნოემბერს, ანდრო ჭიჭინაძე რუსთაველის გამზირზე "ძალადობრივი ჯგუფის მოქმედებებში" იღებდა მონაწილეობას. ჭიჭინაძის წინააღმდეგ საქმეში ორი ვიდეომასალა არსებობს, სადაც პროკურატურის განმარტებით, მსახიობი სამართალდამცავების მიმართულებით ჯოხს და ცარიელ ბოთლს ისვრის. მრავალთვიანი სასამართლო პროცესების მიუხედავად, პროკურატურას არ აქვს პასუხი დაზარალდა, თუ არა რომელიმე სამართალდამცავი ჭიჭინაძეს ნასროლი ნივთებით.

3 სექტემბერს, მოსამართლე ნინო გალუსტაშვილმა ანდრო ჭიჭინაძეს, ონისე ცხადაძეს, ირაკლი ქერაშვილს, რევაზ კიკნაძეს, ლუკა ჯაბუას, გურამ მირცხულავას, ჯანო არჩაიას, ვალერი თეთრაშვილს, გიორგი ტერიშვილის, რუსლან სივაკოვსა და სერგეი კუხარჩუკს 2 წლით თავისუფლების აღკვეთა მიუსაჯა.