საქართველოს ბანკის ICT ასოციაციის და საქართველოს ინოვაციებისა და ტექნოლოგიების სააგენტოს (GITA) თანამშრომლობით შექმნილი პროექტი Code IT-ით დაინტერესებულ ახალგაზრდებს შესაძლებლობას აძლევს, დაეუფლონ პროგრამირების საფუძვლებს.

ამისთვის, პროექტში მონაწილეობის მსურველებმა 22 თებერვლამდე უნდა გაიარონ რეგისტრაცია ბმულზე.

სასწავლო კურსი განკუთვნილია პროგრამირებით დაინტერესებული 14-დან — 18 წლამდე ახალგაზრდებისთვის. მონაწილეების შეირჩევიან შესრულებული დავალებისა და გასაუბრების შედეგად. აღსანიშნავია, რომ პროგრამის ფარგლებში, სწავლა სრულად არის დაფინანსებული საქართველოს ბანკის მიერ.

პროექტის განმავლობაში, შეხვედრები საქართველოს 9 ტექნოპარკსა (თბილისი, ბათუმი, ზუგდიდი, სენაკი, ოზურგეთი, კასპი, გურჯაანი, ახმეტა, თელავი) და 6 დამატებით ლოკაციაზე (მესტია, გორი, საგარეჯო, პანკისი, რუსთავი, ფოთი) ტარდება.

პროგრამა ინტერაქციული სწავლების მეთოდით მიმდინარეობს — მოსწავლეები მუშაობენ პრაქტიკულ დავალებებზე, კურსის დასრულების შემდეგ კი ქმნიან ფინალურ პროექტს, რომელიც საშუალებას აძლევს მათ, შეადგინონ პროფესიული პორტფოლიო.

Code IT-ის ფარგლებში, მონაწილეები ასევე ესწრებიან ვებინარებს, სადაც აქვთ შესაძლებლობა, მიიღონ რჩევები და გაიარონ კონსულტაციები კარიერული განვითარების მიმართულებით.

სატრენინგო მოდული 3 მიმართულებას აერთიანებს:

  • HTML & Css
  • JavaScript & Responsive Page
  • React

კურსის წარმატებით დასრულების შემდეგ, ახალგაზრდები მიიღებენ სერტიფიკატს და შესაძლებლობას, გააგრძელონ სწავლა მომდევნო მოდულებზე.

საქართველოს ბანკი, როგორც განათლების მთავარი მხარდამჭერი, მოსწავლეებისთვის შემეცნებისა და ახალი აღმოჩენების შესაძლებლობების შექმნას განაგრძობს. სწორედ ამ მიზნით, მხარს უჭერს და ახორციელებს 40-ზე მეტ პროექტს.

საქართველოს ბანკის მიერ შექმნილი საგანმანათლებლო შესაძლებლობების შესახებ დეტალური ინფორმაციის მისაღებად ეწვიეთ ვებგვერდს.