სახალხო დამცველის აპარატი ოცნების ხელისუფლების პარლამენტის მიერ "გრანტების შესახებ" კანონის გამკაცრებას და სხვა კანონპროექტებში შეტანილ ცვლილებებს ეხმიანება.

ომბუდსმენის განცახდებით, "წარმოდგენილი საკანონმდებლო ცვლილებები შესაძლოა წინააღმდეგობაში მოვიდეს, როგორც გამოხატვის თავისუფლების დაცვის საერთაშორისო სტანდარტებთან, ისე საქართველოს კონსტიტუციასთან და შექმნას დაწესებული შეზღუდვების ზედმეტად ფართო ინტერპრეტაციის შესაძლებლობა".

განცხადებაში ვკითხულობთ, რომ სახალხო დამცველი კანონმდებლობაში განხორციელებული ცვლილებების შეფასების შემდეგ, "შესაბამისი წინაპირობების არსებობის შემთხვევაში" საქართველოს საკონსტიტუციო სასამართლოს სარჩელით მიმართავს.

"საქართველოს სახალხო დამცველი ეხმიანება საქართველოს პარლამენტში ამჟამად მიმდინარე საკანონმდებლო პროცესს, რომლის ფარგლებში განიხილება 7 საკანონმდებლო აქტში, მათ შორის, "გრანტების შესახებ" საქართველოს კანონში, საქართველოს სისხლის სამართლის კოდექსში, საქართველოს ადმინისტრაციულ სამართალდარღვევათა კოდექსში და "მოქალაქეთა პოლიტიკური გაერთიანებების შესახებ“ საქართველოს ორგანულ კანონში.

როგორც დღეს საზოგადოებისთვის საკომიტეტო განხილვის დროს გახდა ცნობილი, პირველი მოსმენის შემდეგ, საკანონმდებლო პაკეტში გარკვეული ცვლილებები შევიდა და კიდევ უფრო გაფართოვდა დასჯად ქმედებათა ჩამონათვალი. კერძოდ, გავრცელებული ინფორმაციით, სისხლისსამართლებრივად დასჯად ქმედებად ცხადდება "ექსტრემიზმი საქართველოს კონსტიტუციური წყობილების წინააღმდეგ".

სახალხო დამცველის მოსაზრებით, წარმოდგენილი საკანონმდებლო ცვლილებები შესაძლოა წინააღმდეგობაში მოვიდეს, როგორც გამოხატვის თავისუფლების დაცვის საერთაშორისო სტანდარტებთან, ისე საქართველოს კონსტიტუციასთან და შექმნას დაწესებული შეზღუდვების ზედმეტად ფართო ინტერპრეტაციის შესაძლებლობა.

გამომდინარე აქედან, საქართველოს სახალხო დამცველი შეაფასებს პარლამენტის მიერ საბოლოოდ დამტკიცებულ საკანონმდებლო ცვლილებებს და შესაბამისი წინაპირობების არსებობის შემთხვევაში, სარჩელით მიმართავს საქართველოს საკონსტიტუციო სასამართლოს," — ვკითხულობთ სახალხო დამცველის განცახდებაში.

შეგახსნებეთ, ოცნების პარლამენტის იურიდიული კომიტეტის თავმჯდომარემ, არჩილ გორდულაძემ დღევანდელ იურიდიულ კომიტეტის სხდომაზე "გრანტების შესახებ" კანონში ცვლილებების განხილვისას თქვა, რომ სისხლის სამართლის კოდექსს ახალი მუხლები დაემატება.

კერძოდ, სსკ-ს ემატება 316-ე პრიმა მუხლი — "ექსტრემიზმი საქართველოს კონსტიტუციური წყობილების წინააღმდეგ", რაც სასჯელის სახედ ითვალისწინებს 3 წლამდე პატიმრობას, ჯარიმას ან სასარგებლო შრომას.