რუსეთი განიხილავს საქართველოსთან რკინიგზის აღდგენას აფხაზეთის გავლით, — ამის შესახებ რუსეთის ვიცეპრემიერმა ალექსეი ოვერჩუკმა განაცხადა.

მან განმარტა, რომ კავკასიაში ყველა დაზიანებული მარშრუტის განბლოკვის მიზნით მიმდინარეობს სამუშაოები. მისი თქმით, რუსეთიდან საქართველოსკენ აფხაზეთის გავლით მარშრუტის აღდგენა მნიშვნელოვანია რეგიონში "ტრანსპორტისა და ლოგისტიკური კავშირის გაძლიერებისთვის".

"ჩვენ იმედი გვაქვს რეგიონის ყველა სახელმწიფოს შორის კონსტრუქციული თანამშრომლობისა ამ მნიშვნელოვანი საერთო ამოცანის გადაჭრაში", — განაცხადა ოვერჩუკმა და აღნიშნა, რომ მარშრუტის აღდგენა აუცილებელია, სხვა საკითხებთან ერთად, არა მხოლოდ რუსეთისა და საქართველოს, არამედ აზერბაიჯანის, სომხეთის, ირანისა და თურქეთის ხალხების ეკონომიკური კეთილდღეობისთვისაც.

აღნიშნული ინფორმაციის გავრცელების შემდეგ, კრემლისტური პარტია სოლიდარობა მშვიდობისთვის ლიდერმა, მამუკა ფიფიამ სოციალურ ქსელში დაწერა, რომ "ჩვენი [ქართული] ჯავშანმატარებელი, თბილისიდან მოსკოვში ჩავა უახლოეს მომავალში და აუცილებლად აფხაზეთის გავლით!".

"ჩვენი ჯავშანმატარებელი, თბილისიდან მოსკოვში ჩავა, უახლოეს მომავალში და აუცილებლად ჩამოვა აფხაზეთის გავლით!

მსოფლიო გეოპოლიტიკურ ტურბულენტობაში, რა პოზიცია გვაქვს ჩვენ, როცა ჩვენს რეგიონში ყველა ჩვენი მეზობელი ცდილობს საკუთარი ინტერესები გაატაროს და მოსალაპარაკებლად ჯდება ყველასთან, მათ შორის რუსეთის ფედერაციასთან!

ზანგეზურის დერეფანი, ახალი დერეფანი — რუსეთი, აზერბაიჯანი, სომხეთი — თურქეთთან კავშირში და რჩება შთაბეჭდილება რომ პოლიტიკურ რუკაზე საქართველოს გაქრობის სურვილი აქვთ საქართველოს დაუძინებელ მტრებს!!!

ცნობილია რომ რუსეთის ვიცეპრემიერმა ალექსეი ოვერჩუკმა განაცხადა, რომ რუსეთი სომხეთთან რკინიგზის ორი მონაკვეთის აღდგენაზე მოლაპარაკებებს დაიწყებს. მან დასძინა, რომ ამ მონაკვეთების აღდგენით, რუსეთი თურქეთთან, ირანთან და აზერბაიჯანთან რკინიგზის მიმოსვლას გახსნის. მოსკოვი ასევე განიხილავს საქართველოსთან რკინიგზის მიმოსვლის აღდგენას აფხაზეთის გავლით.

ამიტომაც გავიმეორებ: ჩვენი ჯავშანმატარებელი, რომელიც თბილისიდან მოსკოვში ჩავა, უახლოეს მომავალში და აუცილებლად ჩამოვა აფხაზეთის გავლით!", — წერს პრორუსი მამუკა ფიფია.