რეჟისორი გეგა გაგნიძე ბათუმის დრამატული თეატრის მიერ მისი სპექტაკლის გაუქმებას ეხმაურება. ის სოციალურ ქსელში წერს, რომ პრემიერამდე ერთი დღით ადრე თეატრის დირექტორმა შემოუთვალა, თურმე "მაღლა" ზარი იყო შესული და თუ სპექტაკლში პოლიტიკური ნარატივი დარჩებოდა, პრემიერა ვერ შედგებოდა.

გეგა გაგნიძე მადლობას უხდის შემოქმედებით ჯგუფს და დასძენს, რომ "რჩება სამშობლოში და აგრძელებს საყვარელი საქმის კეთებას, იქ, სადაც "მოსალოდნელ სუბიექტურ პოლიტიკურ აქტად" არ მომინათლავენ სცენებს სპექტაკლიდან".

"დრო-ჟამი ამას გვიქადის... რა გითხრათ? რით გაგახაროთ?"

ბათუმის დრამატული თეატრ-ის ადმინისტრაციის გადაწყვეტილება გამოწვეულია უმეცრებითა და უგუნურებით.

ასე ხდება მაშინ, როცა საჯარო თანამდებობაზე ხელდასხმული ადამიანი პასუხისმგებელია მის ხელდამსხმელთან და არა საზოგადოების წინაშე; (იხილეთ საქართველოს უახლესი ისტორია)
ამ უგუნურ და უმეცარ გადაწყვეტილებაზე ადმინისტრაციასთან ერთად თანაბრად პასუხისმგებელია თეატრის სამხატვრო საბჭო. მათ შორის საბჭოს ის წევრები, რომლებიც მხოლოდ საზოგადოების რეაქციის შემდეგ აღშფოთდნენ და გაემიჯნენ თეატრის ადმინისტრაციის განცხადებას. ამას ფლიდობა ეწოდება.

ამ უგუნურების ჩადენამდე, (უკაცრავად ტავტოლოგიისთვის) ერთი დღით ადრე თეატრის დირექტორმა შემომითვალა, რომ თურმე "მაღლა" ზარი იყო შესული და თუ სპექტაკლში პოლიტიკური ნარატივი დარჩებოდა, პრემიერა ვერ შედგებოდა.

იმ ერთ ცხოვრებას რა ვუთხარი, ჩემს შემოქმედებაში ვინმეს მაამებლად რაიმეს ვიტყვი, ან რაიმეზე დავდუმდები.

ბათუმის დრამატული თეატრის ხელმძღვანელობას და საბჭოს წევრებს გირჩევთ, ლაფის ჩამოსაწმენდად, სატელევიზიო საინფორმაციო ბადეებსა და თეატრის დერეფნებში მტკნარი ტყუილებისა და მოგონილი ბრალდებების საკენკად დაყრას შეეშვათ. (რთული ქვეწყობილი წინადადება) უმჯობესია აქ დავასრულოთ.

მე მართალი ვარ შემოქმედებით ჯგუფთან, რომელთან ერთადაც 2 თვეზე მეტი ვიშრომე მართალი ვარ თეატრის წინაშე, მართალი ვარ ბათუმელებთან, გათენებულ ღამეებთან,
საკუთარ პროფესიასთან, საკუთარ სინდისთან და სამოქალაქო პოზიციასთან. გულითად მადლობას ვუხდი ყველა ადამიანს, ვინც უხილავი შრომისთვის გაისარჯა.

მადლობა სცენის მემანქანეებს, მკერავებს, სადადგმო ნაწილის ხელმძღვანელს, თანაშემწეს,
დამლაგებლებს, დაცვის თანამშრომლებს, კოსტიუმების ჩამცმელებს, გამხმოვანებლებს, გამნათებელს, ადმინისტრატორს, კაპელდინერებს, რომელთა გაცნობაც არ დამცალდა.
უნიჭიერეს მსახიობებს შესანიშნავი რეპეტიციებისთვის. ანუშკა ჩხეიძეს არაჩვეულებრივი მუსიკისთვის. მარიამ ძმანაშვილს საოცარი კოსტიუმებისთვის და სცენოგრაფიისთვის. ამიკოს და ზაზას ვიდეო საოცრებებისთვის. მოზგის აუდიორეაქციული განათებისთვის.
რეზის მხატვრული განათებისთვის. სამხატვრო საბჭოს ერთადერთ წევრს, კახა კობალაძეს, ღირსეული პოზიციისთვის! მადლობას ვუხდი ყველას ვინც გამომრჩა.
მადლობას ვუხდი, მეგობრებს, კოლეგებსა და უცნობ ადამიანებს მხარდაჭერისთვის.


პ.ს
არსად არ მივდივარ. არც პოლიტიკური თავშესაფარი მჭირდება, არც "რეპრესირებული ხელოვანის" სტატუსი. ვრჩები ჩემს სამშობლოში და ვაგრძელებ ჩემი საყვარელი საქმის კეთებას, იქ, სადაც "მოსალოდნელ სუბიექტურ პოლიტიკურ აქტად" არ მომინათლავენ სცენებს სპექტაკლიდან, უხილავი სპექტაკლიდან, სათვალთვალო კამერებში ნანახი სპექტაკლიდან. ჰო და ბოლოს, მიპატიებია ყველასთვის ვინც ეს ბოროტება ჩაიდინა", — წერს გეგა გაგნიძე.

ცნობისათვის, 6 თებერვალს ბათუმის დრამატულმა თეატრმა, პოლიტიკისგან გამიჯვნის მოტივით, გეგა გაგნიძის სპექტაკლი გააუქმა. სოციალურ ქსელში გამოქვეყნებულ განცხადებაში თეატრი წერდა, რომ რეჟისორი "სპექტაკლში სუბიექტური პოლიტიკური აქტის განხორციელებას გეგმავდა", "ბათუმის დრამატული თეატრი კი კატეგორიულად ემიჯნება თეატრის სივრცის პოლიტიზებას".

ბათუმის დრამატული თეატრის დირექტორიად კოტე მჟავია 2025 წლის ნოემბერში დაინიშნა. ის გეგა გაგნიძის განცხადებას ჯერჯერობით არ გამოხმაურებია.

როგორც გამოცემა "ბათუმელები" წერს, ის პროფესიით მსახიობია. 1999 წლიდან დღემდე ლიტერატურული თეატრის ერთ-ერთი დამფუძნებელი და ხელმძღვანელია. 2012-2016 წლებში მუშაობდა დმანისის თეატრის სამხატვრო ხელმძღვანელად, 2005-2010 წლებში იყო ნოდარ დუმბაძის სახელობის მოზარდ მაყურებელთა თეატრის, 2006-2009 წლებში ახმეტელის თეატრის, ხოლო 1999-2005 წლებში რუსთავის საბავშვო თეატრის მსახიობი, 1998-2003 წლებში მერაბ კოსტავას სახელობის მუსიკალურ-ლიტერატურულ თეატრში ეკავა ადმინისტრატორის პოზიცია.