ოკუპირებული ცხინვალის სახელმწიფო უშიშროების კომიტეტის ცნობით, "აგრძელებენ მათ მიერ შპიონაჟის ბრალდებით დაკავებული ქართველი სამოქალაქო აქტივისტის, თამარ მეარაყიშვილის უკანონო საქმიანობის დამადასტურებელი მტკიცებულებების შეგროვებას".

მათი ცნობით, მეარაყიშვილი დაიქირავეს საქართველოსთვის სადაზვერვო და დივერსიული საქმიანობის ჩასატარებლად. გამოძიების თანახმად, თავდაპირველად, იგი მონაწილეობდა ოკუპირებული ცხინვალის და რუსეთის ფედერაციის უსაფრთხოებისთვის პირდაპირი საფრთხის შემცველი ინფორმაციის შეგროვებასა და გადაცემაში.

"მეარაყიშვილი გადასცემდა ინფორმაციას პოლიტიკოსების, სამართალდამცავი ორგანოების თანამშრომლების, რუსი სამხედრო მოსამსახურეების, მათი ადგილმდებარეობისა და რუსული სამხედრო ტექნიკის გადაადგილების შესახებ. იგი ფარულად იწერდა საუბრებს ოფიციალურ პირებთან (რომლებიც საიდუმლო ინფორმაციას ატარებდნენ) შემდგომი კომპრომეტირებისთვის",— ნათქვამია ე.წ. სახელმწიფო უშიშროების კომიტეტის განცხადებაში.

მათივე ცნობით, წლების განმავლობაში, მეარაყიშვილმა გააფართოვა თავისი არეალი და, ქართული მხარის ინიციატივით, წარმოადგენდა"ამერიკის ხმის"; რადიო "ეხო კავკაზას" (რადიო "თავისუფალი ევროპის"/"რადიო თავისუფლების" პროექტი); "კავკაზსკი უზელის" ინფორმაციის წყაროს. ორგანიზაციების ჩამონათვალშია ასევე — არასამთავრობო ორგანიზაცია "კამარა"; "სტუდენტებისა და ახალგაზრდების ახალგაზრდული ცენტრი"; არასამთავრობო ორგანიზაცია International Alert; ჰაინრიხ ბიოლის ფონდის თბილისის ოფისი.

რუსული მედია წერს, რომ ოკუპირებული ცხინვალის ე.წ. უშიშროების კომიტეტმა გამოავლინა თამარ მეარაყიშვილის კონტაქტები საქართველოში. ამ კონტაქტებს შორისაა: საქართველოს სუს-ის უფროსი მამუკა მდინარაძე; რეინტეგრაციის საკითხებში საქართველოს ყოფილი მინისტრი პაატა ზაქარეიშვილი; თავდაცვის ყოფილი მინისტრი ირაკლი ალასანია; ქართული ოცნების პარტიის ყოფილი თავმჯდომარე ირაკლი ღარიბაშვილი და გაუქმებული სამხრეთ ოსეთის დროებითი ადმინისტრაციის ყოფილი ხელმძღვანელი თამაზ ბესტაევი.

გავრცელებული ინფორმაციაში ასევე წერია, რომ "ქართული მხარის ინიციატივით, მეარაყიშვილი არაერთხელ დაესწრო საზღვარგარეთ არასამთავრობო ორგანიზაციების მიერ ორგანიზებულ ტრენინგებსა და სემინარებს, სადაც, სავარაუდოდ, წარმოადგენდა სამხრეთ ოსეთის მხარეს, ამახინჯებდა ინფორმაციას სამხრეთ ოსეთის რესპუბლიკის შიდა პოლიტიკური პროცესების შესახებ, რითაც დისკრედიტაციას უწევდა სამხრეთ ოსეთის სახელმწიფოს სუვერენიტეტსა და დამოუკიდებლობას.

თამილა მეარაყიშვილის მიერ გადადგმული ყოველი ნაბიჯი კოორდინირებული იყო უცხოური სადაზვერვო სამსახურების მიერ და წარმოადგენდა მხოლოდ ქართული მხარის ინტერესებს".

როგორც გავრცელებულ განცხადებაში წერია, ოკუპირებული ცხინვალის ე.წ. უშიშროების კომიტეტი გამოავლენს ოკუპირებულ ტერიტორიაზე და მის ფარგლებს გარეთ მყოფი თანამზრახველებს და პასუხისგებაში მიეცემათ.

შეგახსენებთ, რომ თამარ მეარაყიშვილი 22 დეკემბერს შპიონაჟის ბრალდებით დააკავეს. ოკუპირებული ცხინვალის საქალაქო სასამართლომ 24 დეკემბერს მას ორთვიანი წინასწარი პატიმრობა შეუფარდა. პროტესტის ნიშნად სამოქალაქო აქტივისტმა მშრალი შიმშილობა დაიწყო.

თამარა მეარაყიშვილი 31 დეკემბერს გაათავისუფლეს და ქართულ მხარეს გადმოსცა.