სტივ ნიკანდროსმა, ჰიუსტონში დაფუძნებული ენერგეტიკული კომპანიის თავმჯდომარემ და აღმასრულებელმა დირექტორმა, რომელიც საქართველოში ნახევარ მილიარდ დოლარზე მეტის ოდენობის ინვესტიციებს აანონსებს, ამ თვეში სულ მცირე ერთ რესპუბლიკელ კონგრესმენს წერილი გაუგზავნა და მოუწოდა, წინააღმდეგობა გაეწია "MEGOBARI აქტისთვის". ამის შესახებ ინფორმაციას The Hill ავრცელებს.

ნიკანდროსის წერილში აღნიშნულია, რომ მისი კომპანია მომდევნო ორი წლის განმავლობაში საქართველოში 100 მილიონი დოლარის ოდენობის ახალ საინვესტიციო პროგრამას ამზადებს. მისი მტკიცებით, "MEGOBARI აქტი" და თბილისზე სანქციების დაწესების სხვა მცდელობები საქართველოში მოქმედ ამერიკულ ბიზნესებს ზიანს მიაყენებს.

"MEGOBARI აქტი" მასობრივი პროტესტების ძალადობრივი ჩახშობის, დემოკრატიული უკუსვლისა და რუსეთის, ჩინეთისა და ირანის მიმართ დაახლოების გამო, ქართული ოცნების დასჯას ისახავს მიზნად. The Hill წერს, რომ კანონპროექტი ამ ეტაპზე კონგრესში გაჩერებულია და მიღების მკაფიო პერსპექტივა არ აქვს.

მიუხედავად ამისა, კანონპროექტს ფართო მხარდაჭერა აქვს როგორც წარმომადგენელთა პალატაში, ისე სენატში. დოკუმენტი 2025 წლის მარტში წარმომადგენელთა პალატამ დიდი ორპარტიული მხარდაჭერით დაამტკიცა, თუმცა სენატში მის წინსვლას ხელი სენატორმა მარკვეინ მალინმა შეუშალა.

ნიკანდროსს კონგრესში მარკვეინ მალინის საარჩევნო კამპანიის, მისი პოლიტიკური კომიტეტის და სხვა რესპუბლიკელი სენატორებისთვის თანხა აქვს შეწირული. მალინმა სექტემბერში The Hill-ს განუცხადა, რომ მისი წინააღმდეგობა "MEGOBARI აქტის" მიმართ ნიკანდროსთან კავშირში არ არის. ამასთან, 2020 წელს, საქართველოს მთავრობასთან დავის დროს, მალინი ნიკანდროსის ერთ-ერთი კომპანია Frontera Resources-ის ინტერესებს იცავდა.

The Hill-ის ცნობით, ნიკანდროსმა 19 იანვარს კონგრესმენებს წერილი გაუგზავნა და მოუწოდა, "MEGOBARI აქტისთვის" (H.R. 36 / S.868) და ნებისმიერი დამატებითი კანონმდებლობისთვის, რომელიც მას ეფუძნება, წინააღმდეგობა გაეწიათ". წერილი ნიკანდროსმა თავისი კომპანია TXN Energy Holdings Inc.-ის სახელით დაწერა. კომპანიის ვებგვერდი იმავე მისამართს იყენებს, რასაც Frontera Resources.

Frontera Resources-ის 2020 წლის დავის დროს კომპანია საქართველოში 500 მილიონ დოლარზე მეტი ინვესტიციაზე საუბრობდა. გავრცელებული ინფორმაციით, კომპანიამ ლობირებაზე დაახლოებით 1 მილიონი დოლარი დახარჯა, ხოლო იმავე წლის ივლისში თბილისმა Frontera-ს ქვეყანაში ოპერაციების განახლების უფლება მისცა.

"MEGOBARI აქტიც" რესპუბლიკელი კონგრესმენის, ჯო უილსონის (სამხრეთი კაროლინა) ინიციატივაა, რომელმაც ადრე ნიკანდროსის ლობისტური საქმიანობის მიმართ შეშფოთება გამოთქვა.