ევროკომისიამ საქართველოს დიპლომატიური, სამსახურებრივი და ოფიციალური პასპორტების მფლობელებისთვის უვიზო მიმოსვლის შეჩერების პროცესი დაიწყო, — ამის შესახებ ბრიფინგზე ევროკომისიის პრესსპიკერმა, მარკუს ლამერტმა 21 იანვარს განაცხადა. მისი თქმით, "საქართველოს ხელისუფლების ქმედებები ძირს უთხრის იმ პრინციპებს, რომლებზეც დაფუძნებულია უვიზო რეჟიმი".

"საქართველოს ხელისუფლების ქმედებები ძირს უთხრის იმ პრინციპებს, რომლებზეც ვიზალიბერალიზაციაა დაფუძნებული. ეს ქმედებები შეუსაბამოა ევროკავშირის ნორმებსა და ღირებულებებთან და აფერხებს ევროკავშირსა და საქართველოს შორის ეკონომიკური, ჰუმანიტარული, კულტურული, სამეცნიერო და სხვა სახის კავშირების სტაბილურ განვითარებას. ამ ეტაპზე, როგორც პირველი ნაბიჯი, კომისიამ თავისი შეფასება გადაუგზავნა ევროპარლამენტსა და საბჭოს. მიღების შემდეგ ეს ზომები უზრუნველყოფს, რომ დიპლომატიური პასპორტების მფლობელებისთვის უვიზო მიმოსვლის შეჩერება ყველა წევრ ქვეყანაში ერთიანად მიიღება", — განაცხადა ლამერტმა.

ევროკომისიის პრესსპიკერის თქმით, პირველ ეტაპზე ევროკომისიამ თავისი შეფასება გადაუგზავნა ევროპარლამენტსა და ევროკავშირის საბჭოს. მათი მიღების შემდეგ, უვიზო მიმოსვლის რეჟიმი შეუჩერდებათ დიპლომატიური, სამსახურებრივი და ოფიციალური პასპორტების მფლობელებს ევროკავშირის ყველა წევრ ქვეყანაში.

"პირველი ეტაპი ეხება სწორედ დიპლომატიური პასპორტების მფლობელებს. არსებობს შესაძლებლობა, რომ თუ მომავალში გაგრძელდება უკუსვლა, ზომები გავრცელდეს მთლიან მოსახლეობაზეც, თუმცა ეს ავტომატური პროცესი არ არის", — განაცხადა ლამერტმა.

მისივე თქმით, ჩვეულებრივი პასპორტების მფლობელები კვლავ შეძლებენ უვიზოდ ევროპაში მოგზაურობას.

ევროკავშირის წევრი ქვეყნების ელჩებმა ქართული დიპლომატიური და სამსახურებრივი პასპორტებისთვის უვიზო რეჟიმის შეჩერებას მხარი 24 იანვარს დაუჭირეს და შეზღუდვა ოფიციალურად ბრიუსელში, 27 ნოემბერს გაფორმდა.