სტუდენტებს, რომლებმაც საუნივერსიტეტო გადასახადის სახელმწიფო დაფინასება 2025 წლის 17 დეკემბრამდე მოიპოვეს, დაფინანსება სწავლის დასრულებამდე შეუნარჩუნდებათ. ოცნების ხელისუფლების პრემიერმინისტრის, ირაკლი კობახიძის ხელმოწერილ დადგენილებაში ვკითხულობთ, რომ აღნიშნულ სტუდენტებს დაფინანსება 2030-2031 წლამდე ექნებათ.

"მუხლის პირველი პუნქტით გათვალისწინებული პირების 2030-2031 სასწავლო წლის ჩათვლით სახელმწიფოს მიერ სწავლის დაფინანსების უზრუნველყოფის მიზნით, საქართველოს განათლების, მეცნიერებისა და ახალგაზრდობის სამინისტრომ, საქართველოს განათლების, მეცნიერებისა და ახალგაზრდობის სამინისტროს მმართველობის სფეროში მოქმედმა საჯარო სამართლის იურიდიულმა პირებმა და უმაღლესმა საგანმანათლებლო დაწესებულებებმა განახორციელონ შესაბამისი ღონისძიებები 2025 წლის 17 დეკემბრამდე მოქმედი "უმაღლესი განათლების შესახებ" საქართველოს კანონის შესაბამისი ნორმებისა და ამ ნორმების საფუძველზე გამოცემული 2025 წლის 17 დეკემბრამდე მოქმედი სამართლებრივი აქტების საფუძველზე," — ვკითხულობთ დადგენილებაში.

შეგახსენებთ, 10 დეკემბერს, ოცნების პარლამენტმა "უმაღლესი განათლების შესახებ" კანონში III მოსმენით ცვლილებები დაამტკიცა.

კანონპროექტის განმარტებით ბარათში ვკითხულობთ, რომ "არსებული საგრანტო სისტემა საჭიროებს რეფორმირებას, რადგან იგი სათანადოდ ვერ ასახავს სხვადასხვა ფაკულტეტის განსხვავებულ ფინანსურ მოთხოვნებს და არ არის სრულად ორიენტირებული უმაღლესი განათლების სფეროში სახელმწიფოს პრიორიტეტული ამოცანების შესრულებაზე".

შესაბამისად, 2026 წლის შემდეგი სასწავლო წლიდან სტუდენტები სახელმწიფო უნივერსიტეტებში უფასოდ ისწავლიან, ხოლო კერძო უნივერსიტეტებში სახელმწიფო დაფინანსების მოპოვებას ვეღარ შეძლებენ.

პარტია თავისუფლების მოედნის ერთ-ერთი ლიდერის და ეროვნული სასწავლო გეგმებისა და შეფასების ცენტრის ყოფილი დირექტორის, სიმონ ჯანაშიას განმარტებით ამ ცვლილებით საქართველოში არსებული 63 უნივერსიტეტიდან მხოლოდ 19-ში შეძლებს სტუდენტი დაფინანსების მოპოვებას.

ოცნების ხელისუფლების განათლების მინისტრის, გივი მიქანაძის შეფასებით, აღნიშნული ცვლილება ინოვაციურია, რადგან "ფაქტობრივად უფასო ხდება სწავლა [იმათთვის], ვინც ჩააბარებს".

კანონპროექტში შეტანილ ცვლილებებზე სრულად იხილეთ: