ამერიკული კინოაკადემიის წევრებმა სექსუალურ შევიწროვებაში დადანაშაულებული პროდიუსერი, ჰარვი ვაინშტაინი ორგანიზაციიდან გარიცხეს.

CNN-ის ცნობით, აღნიშნული გადაწყვეტილება რიგგარეშე სდომაზე მიიღეს, რომელიც შაბათს, 14 ოქტომბერს, ლოს-ანჯელესში გაიმართა.

საბჭოს განცხადებაში ნათქვამია, რომ ვაინშტაინისთვის წევრობის შეწყვეტა ნიშნავს, რომ ეპოქა, როცა კინოინდუსტრია სექსუალურ შევიწროვებაზე თვალს ხუჭავდა, დასრულდა.

ჰარვი ვაინშტაინი ათწლეულების განმავლობაში ჰოლივუდის გავლენიანი პროდიუსერი იყო, თუმცა მისი კარიერა იმ ქალებმა დაასრულეს, რომლებზეც ის წლების განმავლობაში ძალადობდა.

ვაინშტაინი პირველად მსახიობმა ეშლი ჯადმა, New York Times-ის საშუალებით ამხილა. მისი წერილის მიხედვით, ვაინშტაინმა, 90-იან წლებში, ის სასტუმროს ნომერში კონტრაქტის პირობებზე სასაუბროდ დაიბარა, შემდეგ კი დიალოგი სააბაზანოში შესთავაზა და მასთან ერთად შხაპის მიღება მოსთხოვა.

ნიუ-იორკერმა პირველად გამოაქვეყნა 2015 წლის ჩანაწერი, რომელშიც ვაინშტაინი იტალიელ მოდელს, ამბრა გუტიერესს, აბაზანაში შეყოლას დაჟინებით სთხოვს. ჩანაწერის გავრცელებიდან რამდენიმე საათში ჰარვი ვაინშტაინის ცოლმა, ჯორჯიანა ჩეპმენმა, განქორწინებაზე შეიტანა საბუთები, მისმა ძმამ კი ავადმყოფი და მსოფლიო დონის მატყუარა უწოდა.

გაიგე მეტი: სექსუალური შევიწროება კინოინდუსტრიაში - ჰოლივუდი ჰარვი ვაინშტაინის წინააღმდეგ.