ფოთელი პედაგოგის, იგორ კეკელიასთვის მუქარისა და ჯანმრთელობის ხელყოფის მუქარის შემცველი მესიჯების გაგზავნის ფაქტზე დაკავებულ 2006 წელს დაბადებული თ.ხ.-ს 2 000-ლარიანი გირაო შეეფარდა.

მუქარას წინ უძღოდა იგორ კეკელიასთვის პირადი ცხოვრების ამსახველი კადრების გავრცელება. ადვოკატ თორნიკე მიგინეიშვილის ინფორმაციით, მისი დაცვის ქვეშ მყოფს მუქარის საქმეზე დაზარალებულის სტატუსი მიენიჭა. ადვოკატის განცხადებაში ვკითხულობთ, რომ პედაგოგის სურვილი იყო ბრალდებულის წინააღმდეგ პატიმრობა არ გამოეყენებინათ.

"პირადი ცხოვრების ამსახველი ვიდეოკადრების გავრცელების შემდგომ, პედაგოგის მიმართ განხორციელებული მუქარის ფაქტზე დაკავებულია ახალგაზრდა მამაკაცი.

იგორ კეკელიას კი მუქარის განხორციელების ფაქტზე დაზარალებულის სტატუსი მიენიჭა.

დაზარალებული პედაგოგი გამოთქვამს სურვილს, რომ საქმის განხილვის ფარგლებში, სასამართლოს მიერ საბოლოო გადაწყვეტილების მიღებამდე, დაკავებულ მამაკაცს პატიმრობა არ შეეფარდოს. სავარაუდოდ, იგი გირაოს საფუძველზე გათავისუფლდება.

დანაშაული ითვალისწინებს თავისუფლების აღკვეთასაც.

გრძელდება საგამოძიებო ორგანოსთან თანამშრომლობა დანაშაულებრივ ქმედებებზე სათანადო რეაგირების მიზნით," — წერს ადვოკატი.

ცნობისთვის, 11 იანვარს, პედაგოგმა იგორ კეკელიამ "ტვ პირველთან" საუბრისას განაცხადა, რომ მას, სავარაუდოდ, პირადი ცხოვრების ამსახველი კადრები გაუვრცელეს. მომხდარის შემდეგ მან სკოლის დირექციის მხრიდან ადგილი ჰქონდა ბულინგს და შანტაჟს — საბოლოოდ, პედაგოგი სკოლიდან გაათავისუფლეს.

პედაგოგის განცხადებით, პროკურატურას 10 დეკემბრიდან დღემდე "გონივრული ვადა ჰქონდა", მისი პირადი ცხოვრების კადრების გავრცელების ფაქტთან დაკავშირებით ეფექტური გამოძიება ჩაეტარებინა.

"ჩემთვის ცნობილი გახდა, რომ გავრცელდა სოციალურ ქსელში პირადი ცხოვრების ამსახველი კადრები. სავარაუდო გავრცელების შესახებ მაცნობეს პოლიციიდან, მე გამოვცხადდი, რასაკვირველია, პოლიციაში, რადგან ეს საქართველოს კონსტიტუციით არის მძიმე დანაშაული. მე კატეგორიულად მოვითხოვე, რომ აღძრულიყო სისხლის სამართლის საქმე და სავარაუდო გავრცელების ფაქტი თუკი ნამდვილად დადასტურდებოდა, სავარაუდო გამვრცელებლებიც, ბუნებრივია, უნდა დასჯილიყვნენ.

პროკურატურას გონივრული ვადა უკვე ჰქონდა იმისათვის, რომ 10 დეკემბრიდან დღემდე ამ ფაქტთან დაკავშირებით გარკვეული ნაბიჯები გადაედგა...

შემდეგ, მე რატომღაც ველოდი, რომ ჩემი სკოლის პედაგოგები გარკვეულ ემპათიას გამოხატავდნენ დაზარალებული პედაგოგის მიმართ, თუმცა დაზარალებულის სტატუსი დღემდე არა მაქვს მიღებული, მოწმის სტატუსით ვარ დაკითხული პოლიციასა და პროკურატურაში. ამას მოჰყვა სკოლაში დაშინება, ბულინგი, ზეწოლა. თუკი მსგავსი კადრები გავრცელდა, ეს ხელს შეუშლის სკოლაში შენს საქმიანობას, შესაძლოა ადგილი ჰქონდეს მასწავლებელსა და მოსწავლეს შორის კონფლიქტს, ამიტომ შენ უნდა დაწერო განცხადება და წახვიდე სამსახურიდანო," — განაცხადა პედაგოგმა.

ადვოკატ თორნიკე მიგინეიშვილის ინფორმაციით, პედაგოგის სკოლიდან განთავისუფლება "მასწავლებლების საჩივრის საფუძველზე მოხდა" და სკოლამ პრობლემების მოგვარებისთვის "უმარტივესი უკანონო გზა" — დაზარალებულის სამსახურიდან განთავისუფლება აირჩია.

"არსებული ფაქტებიდან იკვეთება, რომ სკოლამ აირჩია უმარტივესი, მაგრამ უკანონო გზა — პრობლემის მოგვარება დაზარალებულის სამსახურიდან გათავისუფლებით. ნაცვლად მისი დაცვისა, სკოლამ დაიწყო პროცესები, რომლებიც მიზნად ისახავდა პედაგოგის სკოლიდან გაშვებას.

მოულოდნელად სკოლაში გაჩნდა სხვადასხვა საჩივარი მასწავლებლის წინააღმდეგ. ეს საჩივრები სკოლის დისციპლინურმა კომიტეტმა განიხილა უკიდურესად მოკლე ვადებსა და დარღვეული პროცედურებით:

პედაგოგს არ მიეწოდა საჩივრების შინაარსი;

არ მიეცა საკუთარი პოზიციის დაფიქსირების შესაძლებლობა;

კომისია ჩატარდა კვირა დღეს, სხდომის ოქმი კი სხვა დღით დათარიღდა.

30 დეკემბერს ჩემი დაცვის ქვეშ მყოფი გაათავისუფლეს სამსახურიდან," — განაცხადა ადვოკატმა.

მიგინეიშვილმა ასევე დასძინა, რომ "ვიდეომასალა პრაქტიკულად მთელმა ქალაქმა ნახა" და უწყებამ ჯერ-ჯერობით საქმის გამოძიება ვერ შეძლო.