ტრამპმა ხელი მოაწერა აღმასრულებელ ბრძანებას, რომლითაც შეერთებული შტატები 66 საერთაშორისო ორგანიზაციიდან გამოვიდა, აქედან 31 გაეროს ეგიდითაა მოქმედი. ადმინისტრაცია მათ "ფუჭად, არაეფექტურად და მავნედ" მიიჩნევს. ისინი "აღარ ემსახურებიან აშშ-ის ინტერესებს", — ნათქვამია თეთრი სახლის განცხადებაში.

ეს ინფორმაცია თეთრი სახლის მიკრობლოგზე ოთხშაბათს, 7 იანვარს გამოქვეყნდა.

რომელი საერთაშორისო ორგანიზაციიდან გადის შეერთებული შტატები?

ამ ორგანიზაციების სრული სია ხელმისაწვდომია თეთრი სახლის ვებსაიტზე. სხვა ორგანიზაციებთან ერთად, მასში შედის უკრაინის მეცნიერებისა და ტექნოლოგიების ცენტრი (STCU), რომელიც შეიქმნა მასობრივი განადგურების იარაღის გაუვრცელებლობის ხელშეწყობის მიზნით; გარემოსდაცვითი თანამშრომლობის კომისია (Commission for Environmental Cooperation), ონლაინ თავისუფლების კოალიცია (Freedom Online Coalition), მიგრაციისა და განვითარების გლობალური ფორუმი (Global Forum on Migration and Development), რეგიონული თანამშრომლობის საბჭო (Regional Cooperation Council), ევროპის საბჭოს ვენეციის კომისია (Venice Commission of the Council of Europe). ასევე — გაერთიანებული ერების ორგანიზაციის (გაერო) ორგანიზაციები: საერთაშორისო სამართლის კომისია, საერთაშორისო სავაჭრო ცენტრი, შეიარაღებული კონფლიქტის დროს ბავშვთა საკითხებში გენერალური მდივნის სპეციალური წარმომადგენლის ოფისი, მშვიდობის მშენებლობის კომისია, მშვიდობის მშენებლობის ფონდი, გაეროს დემოკრატიის ფონდი და ა.შ.

ამასობაში, აშშ-ის სახელმწიფო მდივნის, მარკო რუბიოს მიერ ამ თემაზე გაკეთებულ განცხადებაში ნათქვამია, რომ დონალდ ტრამპის ადმინისტრაციამ ის ორგანიზაციები, რომლებშიც ქვეყანა წევრობას წყვეტს, "ფუჭად ხარჯვად, არაეფექტურად, მავნედ", "ცუდად მართულად", "ზედმეტად" ან "ჩვენი (აშშ-ის) ეროვნული სუვერენიტეტის, თავისუფლებებისა და საერთო კეთილდღეობისთვის საფრთხედ" მიიჩნია.

"ტრამპის ადმინისტრაციამ ეს ინსტიტუტები ზედმეტად მიიჩნია თავისი მასშტაბით, არაეფექტურად თავისი მართვის მეთოდებით, არასაჭიროდ, მფლანგველად, ჩვენი ინტერესების საწინააღმდეგოდ საკუთარი დღის წესრიგის მიმდევრების ინტერესების ქვეშ მყოფი აქტორების ინტერესების გამტარად, ან ჩვენი ერის სუვერენიტეტის, თავისუფლებისა და ზოგადი კეთილდღეობისთვის საფრთხის შემცველად. პრეზიდენტი ტრამპი ნათლად აცხადებს: აღარ არის მისაღები ამ ინსტიტუტებისთვის ამერიკელი ხალხის სისხლის, ოფლისა და საგანძურის გაგზავნა, რასაც თითქმის არანაირი შედეგი არ მოჰყოლია. დასრულდა ის დრო, როდესაც მილიარდობით დოლარის გადასახადის გადამხდელთა ფული უცხოური ინტერესებისთვის მიედინებოდა ჩვენი ხალხის ხარჯზე', — წერია აშშ-ს სახდეპის მიერ გავრცელებულ განცხადებაში.