ვანო მერაბიშვილის წინასწარი პატიმრობის პერიოდში, მისი ციხიდან გაყვანის ფაქტზე, პროკურატურამ გამოძიება დაიწყო.

ამის შესახებ მთავარი პროკურატურის პრესსამსახურმა On.ge-ს განუცხადა:

"ადამიანის უფლებათა ევროპული სასამართლოს 2016 წლის 14 ივნისის გადაწყვეტილების საფუძველზე, საქართველოს მთავარი პროკურატურის ცალკეულ ნაწილში დაიწყო გამოძიება საჯარო მოხელეთა სამსახურებრივი უფლებამოსილების შესაძლო გადამეტების ფაქტზე, სისხლის სამართლის კოდექსის 333-ე მუხლის პირველი ნაწილით გათვალისწინებული დანაშალებრივი ნიშნებით".

ამ მუხლით გათვალისწინებული დანაშაული ისჯება ჯარიმით, ან თავისუფლების აღკვეთით ვადით სამ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.

საქართველოს ყოფილი მთავარი პროკურორი ოთარ ფარცხალაძე, რომელსაც ვანო მერაბიშვილი მისი ციხიდან უკანონოდ გაყვანაში ადანაშაულებს, რუსთავი 2-თან ექსკლუზიურ ინტერვიუში აცხადებს, რომ მისი დაკავების საფუძველი არ არსებობს:

"არა, ვერ დამაკავებენ, არც ველოდები და არც აქვთ საფუძველი, რომ დამაკავონ. ერთადერთი, თუ დაიწყო გამოძიება არ ვიცი, ეგეც ტელევიზიით მოვისმინე. თუ დაიწყო გამოძიება, ვითანამშრომლებ ყველანაირად. გამოძიება, იმედია, მივა ბოლომდე, შესაბამისად როგორც დაიწყება, ისე შეწყდება საქმე".

ადამიანის უფლებათა ევროპულმა სასამართლომ 14 ივნისს გამოტანილ გადაწყვეტილებაში აღნიშნა, რომ ვანო მერაბიშვილის მიმართ ქართულმა სახელმწიფომ დაარღვია კონვენციის მეხუთე მუხლის მესამე პუნქტი და მე-18 მუხლი პირველთან მიმართებით. დარღვევის ერთ-ერთი ეპიზოდი სწორედ ფარცხალაძის პროკურორობის პერიოდს ეხება.