დღეს, 20 ივნისს, ბიზნესმენებთან და ბიზნეს ასოციაციებთან შეხვედრის შემდეგ, ბიძინა ივანიშვილმა ვანო მერაბიშვილის საქმეზე, სტრასბურგის სასამართლოს გადაწყვეტილებაზე კომენტარი გააკეთა. მისი თქმით, თუკი სასამართლოს კითხვები გაუჩნდა დამატებით, ე.ი. საქმე გამოსაძიებელია:

"კარგი იქნებოდა რომ ის გამოძიება თავის დროზე ეწარმოებინათ - რაც შეეხება იმ ბუნდოვან გამონათქვამს რაც სასამართლომ მიიჩნია რომ იყო არასწორი. ის რომ თითქოს ვიღაცამ გაიყვანა და ღამე ესაუბრა ეს ჩემთვის ღიმილის მომგვრელია და სრული აბსურდი მგონია. რადგან კითხვებია ე.ი. უნდა გამოიძიონ".

ბიძინა ივანიშვილმა მისი და ფარცხალაძის შესაძლო ნათესაურ კავშირზეც გააკეთა კომენტარი:

"ხშირად ვხვდებით რა თქმა უნდა. ჩემი ბერა გახლავთ მისი შვილიშვილის ნათლია, როგორც ვიცი".

საქართველოს ყოფილი მთავარი პროკურორი ოთარ ფარცხალაძე, რომელსაც ვანო მერაბიშვილი მისი ციხიდან უკანონოდ გაყვანაში ადანაშაულებს, რუსთავი 2-თან ექსკლუზიურ ინტერვიუში აცხადებს, რომ მისი დაკავების საფუძველი არ არსებობს.

"არა, ვერ დამაკავებენ, არც ველოდები და არც აქვთ საფუძველი, რომ დამაკავონ. ერთადერთი, თუ დაიწყო გამოძიება არ ვიცი, ეგეც ტელევიზიით მოვისმინე. თუ დაიწყო გამოძიება, ვითანამშრომლებ ყველანაირად. გამოძიება, იმედია, მივა ბოლომდე, შესაბამისად როგორც დაიწყება, ისე შეწყდება საქმე".

ადამიანის უფლებათა ევროპულმა სასამართლომ 14 ივნისს გამოტანილ გადაწყვეტილებაში აღნიშნა, რომ ვანო მერაბიშვილის მიმართ ქართულმა სახელმწიფომ დაარღვია კონვენციის მეხუთე მუხლის მესამე პუნქტი და მე-18 მუხლი პირველთან მიმართებით. დარღვევის ერთ-ერთი ეპიზოდი სწორედ ფარცხალაძის პროკურორობის პერიოდს ეხება.