ბრიტანეთის კინოინსტიტუტმა (BFI) წლის მიწურულს 2025-ის საუკეთესო ფილმები დაასახელა. 50 კინოსურათისგან შემდგარ ჩამონათვალში, რომელიც სხვადასხვა ქვეყნის კრიტიკოსებმა შეადგინეს, საპატიო მეცხრე ადგილს იკავებს ქართველი რეჟისორის, ალექსანდრე კობერიძის, უახლესი ნამუშევარი ხმელი ფოთოლი. BFI ფილმს "მომაჯადოებელ საოცრებას" უწოდებს.

"ეს მაგიურრეალისტური სამოგზაურო ფილმი [მიქელანჯელო] ანტონიონის მეტაფიზიკური მისტერიების ტრადიციას აგრძელებს, თუმცა, ყველა მეტად მაინც მარიანო იინასის არაჩვეულებრივი ამბების ქაოსურ პიკარესკულობას მოგაგონებთ", — წერს კინოინსტიტუტის კრიტიკოსი სემ უიგლი, — "კობერიძის დაჟინებულმა მცდელობამ, რომ სილამაზე უხარისხო გამოსახულებაში დაინახოს, იგი შეიძლება რეტრომოყვარულების ისეთ კომპანიაშიც მოახვედროს, როგორებიც მარკ ჯენკინი და გაი მედინი არიან. თუმცა, არსებითი განსხვავება ისაა, რომ კობერიძე ამ გზით კინემატოგრაფიული წარსულის გამოხმობას არ ცდილობს. კინოს ამგვარი იერი არასდროს ჰქონია და მხოლოდ გამორჩეული მეოცნებე თუ დაისახავდა მიზნად, ასეთად ექცია".

ხმელი ფოთოლი კობერიძისთვის მესამე სრულმეტრაჟიანი ნამუშევარია. ფილმი გერმანულ-ქართული ერთობლივი პროექტია და მისი მსოფლიო პრემიერა ლოკარნოს კინოფესტივალზე შედგა ამ ზაფხულს. 3-საათიანი კინოსურათი რამდენიმე დღის წინ აჩვენეს თბილისის 26-ე საერთაშორისო კინოფესტივალზეც, სადაც კობერიძემ საუკეთესო სრულმეტრაჟიანი მხატვრული ფილმისთვის ოქროს პრომეთე მიიღო.

ხმელი ფოთოლი ექსპერიმენტული ნამუშევარია: ძველი ტელეფონით, Sony Ericsson W595-ით, 144p რეზოლუციაში გადაღებული ფილმი გვიყვება გაუჩინარებული სპორტული ჟურნალისტის ძიებაზე. ქალი გაუჩინარებამდე წერილს ტოვებს და მშობლებს სთხოვს, არ ეძებონ, მაგრამ მამამისი ძებნას მაინც იწყებს, ეს გზა კი მას საქართველოს სხვადასხვა სოფელში, საფეხბურთო მოედნების მოსანახულებლად ჩაიყვანს. ყოველ სოფელთან და სტადიონთან ერთად, იცვლებიან ადამიანებიც და მათი ამბები, გაუჩინარებული ფოტოგრაფის პოვნის შანსები კი მცირდება.

კობერიძის წინა ნამუშევარია რას ვხედავთ, როდესაც ცას ვუყურებთ? (2021), რომელმაც საერთაშორისო აღიარება დაიმსახურა, მათ შორის, გახდა კინოკრიტიკოსების რჩეული ბერლინალეზე.

ასევე იხილეთ: