ოცნების პარლამენტის თავმჯდომარე, შალვა პაპუაშვილი 21 ნოემბერს ბრიუსელში დაგეგმილ ადამიანის უფლებათა დაცვის საკითხებზე საქართველო-ევროკავშირის დიალოგის გადადებას გამოეხმაურა. პაპუაშვილის თქმით, "ბრიუსელის "სოვეტიზაციას" ვხედავთ".

"რაც შეეხება 21 ნოემბრის საკითხს, ვნახეთ ის, რასაც შეჩვეული ვართ ბრიუსელის მხრიდან. ბრიუსელი შეჩვეულია საუბარს და შეუჩვეველია კრიტიკას, რაც კიდევ ერთხელ აჩვენებს თუ რამდენად აცდენილია ის მთავარ ევროპულ ღირებულებებს. ეს არის დირექტივებით საუბარი, მხოლოდ მითითებები, ნული კრიტიკის მოსმენის სურვილი და ნული სურვილი მისცეს სხვას განმარტებების შესაძლებლობა. გარდა ამისა, რა კომენტარებსაც ვისმენდით მეორე ტენდენციაც უნდა დავინახოთ. ეს არის თავხედობა, რომ სხვა ხალხების სახელით ისაუბრონ და ამაზეც რაღაც პერიოდია ენა შეგვაჩვიეს. სხვადასხვა ქვეყნის სხვადასხვა მინისტრები რატომღაც შეეჩვივნენ, რომ ქართველი ხალხის სახელით ისაუბრონ. დღეს საფრანგეთის საგარეო საქმეთა მინისტრი იყო, 17%-იანი ქვეყნის მთავრობა 54%-იანი მხარდაჭერის მქონე საქართველოს მთავრობას გვესაუბრება ქართველი ხალხის სახელით და გვეუბნებიან რა სურს ქართველ ხალხს. რა იცის? ნამყოფია საერთოდ საქართველოში? სწორედ ეს არის ტიპური საბჭოური მოვლენა, როდესაც საბჭოთა მოსკოვი სხვა ხალხების სახელით საუბრობდა. ამიტომ ვამბობთ, რომ ვხედავთ "სოვეტიზაციას" ბრიუსელის, რაშიც წვლილი შეაქვთ აღმოსავლეთ ევროპის წარმომადგენლებს", — განაცხადა შალვა პაპუაშვილმა.

შეგახსენებთ, რომ 21 ნოემბერს ადამიანის უფლებათა დაცვის საკითხებზე საქართველო-ევროკავშირის დიალოგის შეხვედრა ევროკავშირის მხარის გადაწყვეტილებით გადაიდო.